Savdo – sanoat palatasi mahsulotlar, ishlar va xizmatlarni texnik jihatdan tartibga solish boʼyicha Ekspertlar kengashi yigʼilishini oʼtkazdi.

Joriy yilning 16 avgust kuni “Zoom” dasturi orqali Savdo-sanoat palatasi Raisning birinchi oʼrinbosari I.Jasimov rahbarligida, Oʼzbekiston texnik jihatdan tartibga solish agentligi bosh boshqarmasi boshligʼi D.Xodjikariev, xalqaro ekspert U.Haqnazar, “Oʼzbekiston muvofiqlikni baholash tadbirkorlik subyektlari” uyushmasi vakillari, tadbirkorlar va boshqa mustaqil ekspertlar ishtirokida mahsulotlar, ishlar va xizmatlarni texnik jihatdan tartibga solish masalalari boʼyicha Ekspertlar kengashi yigʼilishi boʼlib oʼtdi.

Ushbu yigʼilishda Savdo-sanoat palatasiga Oʼzbekiston texnik jihatdan tartibga solish agentligi tomonidan kiritilgan Oʼzbekiston Respublikasining “Texnik jihatdan tartibga solish toʼgʼrisida”gi Qonuni (yangi tahriri) loyihasi (ID-46261) muhokama qilindi.

Mazkur Qonun loyihasi texnik jihatdan tartibga solish toʼgʼrisidagi qonunchilik hujjatlarini xalqaro standartlar bilan uygʼunlashtirish va ushbu sohadagi faoliyat turlarini institutsional jihatdan takomillashtirish maqsadida, Oʼzbekiston Respublikasining “Mahsulot va xizmatlarni sertifikatlashtirish toʼgʼrisida”gi, “Muvofiqlikni baholash toʼgʼrisida”gi va “Texnik jihatdan tartibga solish toʼgʼrisida”gi amaldagi Qonunlari normalarini oʼz ichiga olgan holda ishlab chiqilgan.

Ushbu Qonun loyihasi 8-bob va 62-moddadan iborat boʼlib, unga ixtiyoriy va majburiy standartlarga oʼtish,  muvofiqlikni baholashning majburiy va ixtiyoriy ravishda amalga oshirish muhitini yaratish, texnik reglamentlarni ishlab chiqishda, mahsulotlar muvofiqligini baholashda xalqaro standartlardan foydalangan holda zarur boʼlgan sinov va oʼlchov usullarini belgilovchi normativ hujjatlar roʼyxatini shakllantirish,  mahsulotlarga qoʼllaniladigan majburiy talablarni faqatgina qonunchilikda va texnik reglamentlarda belgilash va boshqa bir qator normalar kiritilgan.

Yigʼilishda mazkur Qonun loyihasini tadbirkorlar va Ekspertlar kengashi aʼzolarining tegishli takliflari, fikr va mulohazalarini inobatga olgan mazmunan qayta koʼrib chiqish belgilandi va shu toʼgʼrisida Ekspertlar kengashi xulosasi tayyorlandi.

SSP Matbuot xizmati