QQS summalarini xisobga olishning yangi tartibi joriy etiladi

Prezident tomonidan 24 avgust kuni “Qoʼshilgan qiymat soligʼi maʼmuriyatchiligini takomillashtirish toʼgʼrisida”gi qaror imzolandi. Hujjat OʼzАda eʼlon qilingan.

Insofli soliq toʼlovchilarga soliq majburiyatlarini bajarishlari uchun yanada qulay shart-sharoitlarni yaratish maqsadida:

2021 yil 1 oktyabrdan boshlab eksport qilinadigan tovarlar uchun ishlatilgan, haqiqatda olingan tovarlar (xizmatlar) boʼyicha toʼlanishi lozim boʼlgan (toʼlangan) QQS summasini soliq toʼlovchining Oʼzbekiston Respublikasidagi bank hisobvaragʼiga chet el valyutasi tushumi kelib tushishidan qatʼi nazar hicobga olish tartibi oʼrnatiladi.

Taqdim etilgan imkoniyat oxirgi bir yil davomida valyuta tushumlarini oʼz vaqtida taʼminlab kelayotgan va eksport shartnomalari boʼyicha muddati oʼtgan debitor qarzdorligi boʼlmagan – intizomli soliq toʼlovchilarga tatbiq etiladi.

Tovarlar “eksport” bojxona rejimi ostida chiqarilgan kundan eʼtiboran 180 kalendarь kuni ichida valyuta tushumi yoki uning bir qismi eksport qiluvchining Oʼzbekiston tijorat banklaridagi hisobvaragʼiga kelib tushmagan taqdirda, QQSning hisobga olingan summasi yoki uning tegishli qismi belgilangan tartibda hisobdan chiqariladi.

2022 yil 1 yanvardan boshlab:

• QQSning salbiy summasini qoplash (qaytarish) uchun soliq organlariga ariza bilan alohida murojaat qilish haqidagi majburiy talab bekor qilinadi;
• soliq toʼlovchi tegishli soliq davri uchun soliq hisobotini topshirishda, soliq organlarini xabardor etgan holda QQS salbiy summasini qoplash (qaytarish) talabini bildirishga haqli.

Uch oy muddatda QQS boʼyicha soliq hisoboti shakllariga soliq toʼlovchilarga qoʼshilgan qiymat soligʼining salbiy miqdorini qoplab berish (qaytarish) boʼyicha soliq organlariga murojaat qilishni aks ettiruvchi tegishli oʼzgartirish va qoʼshimchalar kiritiladi. 2021 yil yakuniga qadar tovarlarni import qilishda va tovarlarni (xizmatlarni) realizatsiya qilishda toʼlanadigan QQS summalarini oʼzaro hisobga olish tartibi ishlab chiqiladi.

Manbaa: Norma.uz

SSP Axborot-xizmati