Tadbirkorlar talabalar uchun DXSh asosida turar joylar quradi

Vazirlar Mahkamasining 09.09.2021 yildagi “Respublika oliy taʼlim muassasalarida talabalarni turar joy bilan qamrab olish darajasini oshirish chora-tadbirlari toʼgʼrisida”gi 563-son qarori qabul qilindi.

Hujjat bilan belgilanishicha, talabalar turar joylari davlat-xususiy sheriklik shartlari asosida quyidagi shakllarda barpo etiladi:

• loyihalarni tadbirkorlik subyektining oʼz mablagʼlari hisobidan erkin kelishiladigan shartlar asosida moliyalashtirish;
• loyihalarni tadbirkorlik subyekti va Davlat byudjeti mablagʼlari hisobidan aralash moliyalashtirish (kamida 200 oʼrinli turar joyni barpo etish uchun);
• loyihalarni tadbirkorlik subyektining toʼliq oʼz mablagʼlari hisobidan moliyalashtirish (kamida 400 oʼrinli turar joyni barpo etish sharti bilan).

Hokimliklar turar joylar qurilishi uchun OTMga 0,5 gektargacha boʼlgan yer maydonlarini unga yaqin joylardan ajratadi.

Tadbirkorga tegishli yer maydoni yoki binoda kamida 50 oʼrinli turar joylarni tashkil etish tizimi joriy etiladi. Bunda, talabalardan har oy yashash uchun yigʼiladigan toʼlov OTM bilan kelishiladi. Turar joyda yashagan har bir talaba uchun tadbirkorga bir oʼquv yili uchun Toshkent shahrida BHMning 10 baravari, boshqa hududlarda esa 5 baravari miqdorida subsidiya taqdim etiladi.

Moliya vazirligi DSQ bilan birgalikda jismoniy shaxslarning uy-joylarini talabalarga ijaraga berish faoliyati boʼyicha olgan daromadlarini soliqdan ozod etish yuzasidan Soliq kodeksiga oʼzgartirish kiritishni nazarda tutuvchi qonun loyihasini tayyorlash topshirildi.

OTMda oshxona va bufetlar ochadigan tadbirkorlarga davlat koʼchmas mulkidan foydalanganlik uchun ijara toʼlovining eng kam stavkalari qoʼllaniladi. Bunda, tadbirkorlar talabalar uchun sifatli oziq-ovqat mahsulotlari va taomlar tayyorlash hamda ularni arzon narxlarda sotish majburiyatini oʼz zimmasiga oladi.

2021 yil 1 sentyabrdan boshlab talabalar bilan ishlash boʼyicha “guruh murabbiyi” instituti bekor qilinadi. 1-3-kurs talabalari holatini doimiy ravishda tahlil qilib boruvchi, mavjud muammolarni bartaraf etishda yaqindan yordam koʼrsatuvchi tyutorlarni biriktirish amaliyoti yoʼlga qoʼyiladi.  Har 120-150 nafar talabaga 1 ta shtat birligi hisobida “tyutor” lavozimi kiritiladi hamda uning oylik maoshi oʼqituvchi-stajor bazaviy lavozim maoshiga tenglashtiriladi.

Mamlakatda jami 228 ta talabalar turar joylarini qurish rejalashtirilmoqda, shu jumladan 2022 yilda - 47 ta, 2023 yilda - 67 ta, 2024 yilda - 62 ta, 2025 yilda - 52 ta talabalar turar joylari.

Hujjat Qonun hujjatlari maʼlumotlari milliy bazasida eʼlon qilingan va 10.09.2021 yildan kuchga kirdi.

Manbaa: Norma.uz

SSP Axborot-xizmati