QORAQALPOG‘ISTON RESPUBLIKASI HUDUDIY KENGASH YIG‘ILISHIDA HOKIM O‘RINBOSARLARI FAOLIYATIDAGI KORRUPSIYA HOLATLARI TAHLIL QILINDI

Aksilkorrupsiya siyosatiga oid islohotlarning joylarda samarali tatbiq etish borasidagi ishlar ahvolini tahlil qilish maqsadida Qoraqalpog‘iston Respublikasi Korrupsiyaga qarshi kurashish hududiy Kengashining navbatdagi yig‘ilishi bo‘lib o‘tdi. Ushbu yig‘ilishda Savdo-sanoat palatasi hodimi B.Ibodullaev ishtirok etdi.

Kun tartibidagi masala - hududdagi hokim o‘rinbosarlari faoliyati hududiy kengash a'zolari tomonidan batafsil o‘rganilgani qayd etildi. Ta'kidlanganidek, hokim o‘rinbosarlari tomonidan 2021-yilda Respublika bo‘yicha jami 36 ta korrupsiya bilan bog‘liq jinoyat sodir etilgan bo‘lsa, shundan 9 tasi yoki har to‘rttadan bittasi Koraqalpog‘iston Respublikasi tuman va shahar hokimi o‘rinbosarlari hisobiga to‘g‘ri kelmoqda. Mazkur jinoyatlarning 4 tasi yer ajratish, 4 tasi byudjet mablag‘larini o‘zlashtirish va davlat mulkini talon-toroj qilish hamda 1 tasi kredit mablag‘larini o‘zlashtirish bilan bog‘liqdir. Natijada davlat va jamiyat manfaatlariga 3 mlrd. 793 mln. so‘mlik moddiy zarar yetkazilgan.

Yig‘ilishda shu kabi korrupsion holatlar, ularning sabab va oqibatlari, oldini olish va bartaraf etish choralari ishtirokchilar e'tibor markazida bo‘ldi. 

Mavzu yuzasidan Respublika prokurori va Vazirlar Kengashi raisi o‘rinbosarining axboroti tinglandi. 

Ular tomonidan tizimda hamon saqlanib qolayotgan korrupsiyaviy xavf-xatarlarni aniqlash va bartaraf etish, tizimning ochiqligini ta'minlash va bu jarayonga fuqarolik jamiyati institutlari, keng jamoatchilik vakillarini jalb qilish masalalari yuzasidan rejalari ma'lum qilindi.

Shuningdek, yig‘ilishda Hududiy kengash tomonidan olib borilgan o‘rganishlar natijasida korrupsiyaning oldini olish bo‘yicha yetarli choralarni ko‘rmagan bir qator tuman, shahar hokimlaridan tushuntirishlar olindi.

Yig‘ilishda belgilangan vazifalar ijrosi qat'iy nazoratga olinishi lozimligi bildirildi.