Palata tomonidan yana bir tadbirkorning manfaatlari himoya qilindi

Oʼzbekiston Savdo-sanoat palatasiga uning aʼzosi “Jizzax hududiy elektr tarmoqlari” MChJ murojaat qilib, huquq va qonuniy manfaatlarini himoya qilishda amaliy yordam soʼragan.

“Jizzax hududiy elektr tarmoqlari” MChJ murojaati oʼrganib chiqilganda, jamiyatga tegishli yer maydonlari tuman zaxira fondiga olinmasdan Zafarobod tuman hokimligining tegishli qarorlari bilan koʼp qavatli uy-joy qurish uchun yer maydonlari ajratib berilganligi va bunda “Maʼmuriy tartib-taomillari toʼgʼrisida”gi Qonun talablari buzilganligi maʼlum boʼldi.

Shu sababdan, Palata aʼzosining huquq va qonuniy manfaatlarini himoya qilish maqsadida, Palata tomonidan oʼz aʼzosi manfaatida tuman hokimligining noqonuniy qarorlarini bekor qilish toʼgʼrisida tegishli sudga daʼvo arizasi bilan murojaat qilingan.

Jizzax tumanlararo maʼmuriy sudi tomonidan ish mazmunan koʼrib chiqilib, Palataning daʼvo talablarini qanoatlantirish va tuman hokimligining qarorlarini haqiqiy emas deb topish toʼgʼrisida hal qiluv qarori qabul qilingan va, shu orqali Palata aʼzosining huquq va qonuniy manfaatlari himoya qilingan.