Turizm va mehmondoʼstlik sohasida faoliyat olib borayotgan tadbirkorlar bilan uchrashuv

Joriy yilning 15 avgust kuni Oʼzbekiston Savdo-sanoat palatasi huzuridagi Turizm masalalari qoʼmitasining turizm va mehmondoʼstlik sohasi tadbirkorlik subʼektlari bilan uchrashuvi boʼlib oʼtdi.

Mamlakat iqtisodiyotining muhim drayverlaridan biri, shubhasiz turizm sohasi hisoblanadi. Oxirgi yillarda davlatimiz rahbari tomonidan sohani tubdan rivojlantirish, yangi turistik zonalar barpo etish va turizm sanoatida faoliyat olib boradigan tadbirkorlik subʼektlarini har tomonlama qoʼllab-quvvatlash maqsadida oʼnlab qaror va farmonlar imzolandi. Buning natijasida mamlakatimizga tashrif buyuradigan sayyohlar soni bir necha baravarga oshib turistik destinatsiya sifatida yetakchi pozitsiyalarni egallashga erishdi.

Shu bilan birgalikda, butun dunyoda kuzatilgan pandemiyadan eng koʼp zarar koʼrgan sohalardan biri ham turizmga toʼgʼri keldi. Sayyohlar va tadbirkorlarning ishonchini tiklash, talabni ragʼbatlantirish va turizmni qayta tiklashni tezlashtirish uchun tezkor chora-tadbirlar mexanizmlarini ishlab chiqish va ularni amalga oshirish zaruriyati paydo boʼldi. Mazkur ogʼir vaziyatdan kam zarar koʼrgan holda chiqish maqsadida davlatimiz rahbari va hukumat tomonidan keng koʼlamli islohotlar amalga oshirildi va izchillik bilan davom ettirilmoqda. 

Oʼzbekiston Savdo-sanoat palatasi raisi D.А. Vaxobov taʼkidlashicha bugungi kunga kelib turizm sanoati sohasida faoliyat olib borayotgan tadbirkorlarni har tomonlama qoʼllab-quvvatlash, ularni qiynayotgan muammolarga tizimli yechim topish va takliflarini oʼrganish maqsadida Savdo-sanoat palatasi huzurida mutlaqo yangi mexanizm asosida faoliyat olib boradigan Turizm masalalari qoʼmitasi tashkil etildi. Mazkur qoʼmita doimiy ravishda tadbirkorlar bilan hamkorlik qilib sohada mavjud muammolarni yechimi buyicha hukumatga takliflar tayyorlaydi. Jahon tajribasiga eʼtibor beriladigan boʼlsa, mazkur tizim oʼzini ijobiy natijalari bilan oʼzini oqlay olgan.

Shuningdek, qoʼmita qoshida sohada uzoq yillik tajribaga ega tadbirkorlardan tashkil topgan Ekspertlar Kengashi tuzildi va unga 25 nafar tadbirkor jalb qilindi. Mazkur kengash tadbirkorlarning muammolariga tezkor yechim topish maqsadida dastlabki tizimli-tahliliy baholashni amalga oshirib yakuniy takliflarni ishlab chiqishda muhim rol oʼynaydi.

Bugungi uchrashuv yakunida, bildirilgan muammo va takliflar joriy yil  20 avgust kuni Prezidentning tadbirkorlar bilan boʼladigan “Ochiq muloqot”ida olib chiqish maqsadini ham oʼzida jamlagan. Shuningdek, muhokama qilingan masalalar va muammolarning yechimi buyicha kontseptual ravishda asoslangan takliflar tegishli vazirlik va idoralar hamda hukumatga yetkazilib ularning natijasi buyicha tadbirkorlar xabardor etilishi rejalashtirilgan.

Savdo-sanoat palatasi turizm sohasida faoliyat olib borayotgan tadbirkorlik subʼektlarini milliy iqtisodiyotimiz uchun alohida muhim boʼgʼin sifatida eʼtirof etadi va ular bilan doimiy ravishda hamkorlik qilishning yangicha mexanizmlarini joriy qilishda davom etadi.