Tadbirkorlikni qoʻllab-quvvatlash uchun hududlarda komissiyalar tashkil etiladi

Iqtisodiy taraqqiyot va kambagʻallikni qisqartirish vazirligi tomonidan Prezidentning “Tadbirkorlik faoliyatini yanada qoʻllab-quvvatlash boʻyicha qoʻshimcha chora-tadbirlar toʻgʻrisida”gi qarori loyihasi muhokama uchun joylashtirildi.

Hududlarda tadbirkorlikni qoʻllab-quvvatlash maqsadida Tadbirkorlar kengashi faoliyatini muvofiqlashtiruvchi Respublika komissiyasi, Qoraqalpogʻiston Vazirlar Kengashi, viloyatlar va Toshkent shahar hamda tuman (shahar) hokimliklari huzurida Tadbirkorlar kengashini  tashkil etish rejalashtirilmoqda.

Qaror bilan quyidagilar tasdiqlanadi:

• Tadbirkorlar kengashi faoliyatini muvofiqlashtiruvchi Respublika komissiyasi tarkibi;
• Kengashning asosiy vazifalari, huquqlari va javobgarligi, Kengash tarkibini shakllantirish, faoliyatini tashkil etish va uning majlisini oʻtkazish tartibini nazarda tutuvchi Tadbirkorlar kengashi toʻgʻrisidagi namunaviy nizom.

Quyidagilar Respublika komissiyasining asosiy vazifalari boʻladi:

• tadbirkorlikni rivojlantirish sohasidagi qonunchilik hujjatlari ijrosi ta’minlanishini nazorat qilish;
• tadbirkorlik faoliyatining rivojlanishi holatini va uning davlat tomonidan qoʻllab-quvvatlanishi tizimini tahlil qilish;
• tadbirkorlik faoliyatini qoʻllab-quvvatlash boʻyicha NHHlar loyihalarini ishlab chiqish zaruriyatini koʻrib chiqish;
• tadbirkorlik sub’yektlarining infratuzilmasini rivojlantirishga koʻmaklashish;
• mahalliy ishlab chiqaruvchilarni qoʻllab-quvvatlash va eksportni rivojlantirish boʻyicha chora-tadbirlarni belgilash.

Loyiha oʻzgartirilishi, unga qoʻshimchalar kiritilishi yoki rad etilishi mumkin.

Lola Abduazimova