Tadbirkorlarning soliq qarziga penya hisoblash vaqtincha toʼxtatildi

“Havo harorati keskin sovib ketishining iqtisodiyotga salbiy taʼsirini kamaytirish uchun tadbirkorlik subʼektlarini qoʼllab-quvvatlash chora-tadbirlari toʼgʼrisida”gi Prezident qarori (PQ–43-son, 03.02.2023 y.) qabul qilindi.

Qarorga koʼra, tadbirkorlarning 2023 yil 1 yanvarga nisbatan 1 fevral holatiga oshgan (hosil boʼlgan) soliq qarzini 2023 yil 1 martdan 1 iyulgacha foizlarsiz, qoʼshimcha shartlar qoʼymasdan va taʼminot talab etmasdan teng ulushlarda boʼlib-boʼlib toʼlashga ruxsat beriladi.

Tadbirkorlarning soliq qarziga penya hisoblash 2023 yil 1 aprelgacha toʼxtatiladi. 

Tashqi savdo operatsiyalari boʼyicha muddati oʼtgan debitor qarzdorlik uchun xoʼjalik yurituvchi subʼektlarga 2023 yil 1 aprelgacha jarimalar qoʼllanilmaydi. 

Shuningdek, tadbirkorlar 2022 yil dekabr va 2023 yil yanvar-fevral oylarida davlat mulkidan foydalanganlik uchun ijara toʼlovlarini 2023 yil 1 martdan 1 iyulgacha teng ulushlarda boʼlib-boʼlib toʼlashi mumkin. 

Tadbirkorlar tomonidan boʼlib-boʼlib toʼlash sharti bilan sotib olingan davlat aktivlari boʼyicha 2022 yil dekabr va 2023 yil yanvar oylarida toʼlanishi lozim boʼlgan toʼlovlar, shu jumladan dastlabki toʼlov toʼlanmaganligi uchun foizlar va penyalar hisoblash 2023 yil 1 aprelgacha toʼxtatib turiladi. 

2022 yil dekabr va 2023 yil yanvar oylarida davlat xaridlari doirasida tuzilgan shartnomalar shartlari havo haroratining keskin sovib ketishi tufayli bajarilmaganligi uchun tadbirkorlarga jarima va penyalar qoʼllanilmaydi.

Havo haroratining keskin sovib ketishi oqibatida qiyinchiliklarga duch kelgan tadbirkorlarga nisbatan 2023 yil 1 aprelgacha davlat foydasiga undiruvlar bilan bogʼliq sud hujjatlari va boshqa organlar hujjatlarining majburiy ijrosi toʼxtatiladi. 

Qarorga koʼra, tadbirkorlarga havo haroratining keskin sovib ketishi oqibatida nosoz holga kelgan asosiy vositalarni taʼmirlash uchun ajratilgan kreditlar boʼyicha kredit summasining 50 foizigacha (50 foizi ham kiradi), lekin umumiy qiymati 2,5 mlrd soʼmdan oshmagan miqdorda kafillik beriladi.