Tadbirkorlik faoliyatini qo‘llab-quvvatlash davlat jamg‘armasi tomonidan kompensatsiya va kafillik taqdim etish shartlari o‘zgarmoqda

Prezident tomonidan 25.03.2023 yildagi “Tadbirkorlik faoliyatini qo‘llab-quvvatlash davlat jamg‘armasi faoliyati takomillashtirilishi munosabati bilan O‘zbekiston Respublikasi Prezidentining va O‘zbekiston Respublikasi Hukumatining ayrim hujjatlariga o‘zgartirish va qo‘shimchalar kiritish to‘g‘risida”gi PF-43-son Farmon imzolandi.

Hujjatga muvofiq:

Tadbirkorlik faoliyatini qo‘llab-quvvatlash davlat jamg‘armasi (keyingi o‘rinlarda – Jamg‘arma) tomonidan kichik tadbirkorlik subʼektlari loyihalariga tijorat banklarining milliy valyutada ajratiladigan, qiymati 5 mlrd so‘mdan, foiz stavkasi Markaziy bank asosiy stavkasining 1,5 baravaridan oshmagan kredit (lizing)lari bo‘yicha:

• 1-3 toifadagi tuman (shahar)larda joylashgan kichik tadbirkorlik subʼektlari loyihalari bo‘yicha foiz stavkasining asosiy stavkadan oshgan, biroq Markaziy bank asosiy stavkasining 30 % ko‘p bo‘lmagan qismini;
• 4-5 toifadagi tuman (shahar)larda joylashgan kichik tadbirkorlik subʼektlari loyihalari bo‘yicha foiz stavkasining asosiy stavkadan oshgan, biroq Markaziy bank asosiy stavkasining 40 % ko‘p bo‘lmagan qismini qoplash uchun uch yil muddatgacha kompensatsiya taqdim etiladi.

Farg‘ona viloyati So‘x tumanida ro‘yxatga olingan va faoliyat yuritayotgan kichik tadbirkorlik subʼektlari loyihalariga tijorat banklarining milliy valyutada ajratiladigan, qiymati 10 mlrd so‘mdan, foiz stavkasi Markaziy bank asosiy stavkasining 1,5 baravaridan oshmagan kredit (lizing)lari bo‘yicha foiz stavkasining 10 foizlik punktidan yuqori qismini qoplash uchun 3 yil muddatgacha kompensatsiya taqdim etiladi.

Maʼlumot uchun: kompensatsiya «2+1” tamoyili asosida avval kredit (lizing)ning dastlabki ikki yiliga taqdim etiladi, tadbirkorlar tomonidan biznes-rejada ko‘zda tutilgan mahsulot (xizmat)larni sotish hamda ish o‘rinlari yaratish ko‘rsatkichlari to‘liq bajarilgan taqdirda, qo‘shimcha bir yilga uzaytiriladi.

Shuningdek Jamg‘arma tomonidan tijorat banklari kredit (lizing)lariga kafillik:

• 1-3 toifadagi tuman (shahar)larda joylashgan kichik tadbirkorlik subʼektlari loyihalariga ajratiladigan kredit summasining 50 foizigacha (50 foizi ham kiradi), biroq umumiy qiymati 2,5 mlrd so‘mdan oshmagan miqdorda;
• 4-5 toifadagi tuman (shahar)larda joylashgan kichik tadbirkorlik subʼektlari loyihalariga ajratiladigan kredit summasining 75 foizigacha (75 foizi ham kiradi), biroq umumiy qiymati 2,5 milliard so‘mdan oshmagan miqdorda taqdim etiladi.

Maʼlumot uchun: «aʼlo» kredit tarixiga ega bo‘lgan kichik tadbirkorlik subʼektlariga, ular avval olgan kreditlari bo‘yicha Jamg‘arma kafilligidan foydalanayotgan bo‘lishidan qatʼiy nazar qo‘shimcha kreditlar bo‘yicha belgilangan umumiy miqdor va shartlar doirasida kafilliklar taqdim etiladi.

Shuningdek, Jamg‘armani boshqarish bo‘yicha Kengashning yangilangan tarkibi tasdiqlanmoqda.

Hujjat Qonunchilik maʼlumotlari milliy bazasida eʼlon qilingan va 25.03.2023 yildan kuchga kirdi.

Sobir Nurberdiyev