Xitoy bilan hamkorlik istiqbollari muhokama qilindi

Joriy yilning 14 aprel kuni Oʻzbekiston Savdo-sanoat palatasi raisi oʻrinbosari Mirkomil Adilov va Hunan Xalqaro savdoni rivojlantirish qoʻmitasi raisi oʻrinbosari Yu Biyruy oʻrtasida uchrashuv boʻlib oʻtdi.

Delegatsiyaning tashrifidan maqsad Oʻzbekistonda oʻtkazilayotgan koʻrgazmalarda ishtirok etish, shuningdek, tashkilotlar oʻrtasidagi hamkorlikni rivojlantirish bo’yicha Oʻzbekiston Savdo-sanoat palatasi bilan muzokaralar olib borishdan iborat.

Shuningdek, xorijiy tomon viloyatining rivojlangan sohalarini, jumladan, ishlab chiqarish (choy va qahva ishlab chiqarish yaxshi rivojlangan), qurilish materiallari, mashinasozlik, elektrotexnika va boshqalarni namoyish etdi.

SSP raisi oʻrinbosari M.Adilov toʻqimachilik sanoati sohasida hamkorlikni rivojlantirish, jumladan, ish haqining o’sishi va ishlab chiqarish hajmining kengayishi sabab Xitoydan ishlab chiqarishni Oʻzbekistonning sanoat zonalariga koʻchirish istagini bildirdi. Shuningdek, M.Adilov Oʻzbekistonning investitsiyaviy salohiyati to'g'risida aytib o'tdi, bu esa o’z navbatida, xorijiy tomonda katta qiziqish uygʻotdi.

Janob Yu Biyruy SSP vakillarini joriy yilning 27-29 iyul kunlari Hunan viloyatida boʻlib oʻtadigan “Hunan International Exhibitions Center” koʻrgazmasiga taklif qildi.

Uchrashuv yakunlari bo‘yicha tomonlar ikki mamlakat ishbilarmon doiralari o‘rtasidagi savdo-iqtisodiy va investitsiyaviy aloqalarni kengaytirish maqsadida tashkilotlar o‘rtasidagi kelgusi hamkorlikni muhokama qilishga kelishib oldilar. Shuningdek, ikki tashkilot oʻrtasida oʻzaro anglashuv memorandumi loyihasini ishlab chiqish masalalari ham muhokama qilindi.

SSP matbuot xizmati