Yashil tadbirkorlikka qadar birinchi qadam

O‘zbekiston Savdo-sanoat palatasida joriy yilning 23 aprel kuni SSP ko‘magida Bellissimo, Evos, MaxWay va Express24 tez ovqatlanish tarmoqlari kuryerlariga 200 ta velosiped taqdim etish marosimi bo‘lib o‘tdi.

Tadbirdan ko‘zlangan asosiy maqsad umumiy ovqatlanish sohasida kichik va o‘rta biznes subyektlariga ko‘maklashish, ish o‘rinlari yaratish va aholi bandligini ta’minlash, faol va tashabbuskor yoshlarni, shuningdek, sog‘lom turmush tarzini qo‘llab-quvvatlash, ekologik toza transport turini rivojlantirishdan iborat.

Tadbirni O‘zbekiston Savdo-sanoat palatasi raisi Davron Vahabov kirish so‘zi bilan ochib berdi. Palata raisi o‘z nutqida velokuryerlik xizmatlarini rivojlantirish mahalliy tadbirkorlik subyektlariga katta iqtisodiy foyda keltirish bilan birga, aholi bandligini ta’minlashda muhim rol o‘ynashini ta’kidladi.

Tadbirda Bellissimo, Evos, MaxWay va Express24 kompaniyalari vakillari ham ishtirok etdi.

Ta’kidlash joizki, kuryerlardan faqat hujjatlar yoki posilkalarni yetkazib berish uchun foydalanilgan davrlar allaqachon o‘tib ketgan. Bugun bu usul yordamida ko‘plab turdagi mahsulotlarni yetkazib berish mumkin. Velosiped yordamida oziq-ovqat yetkazib berish esa katta talabga ega. Bu xizmat turli ob-havo sharoitlarida va kun bo‘yi faoliyat olib borishi mumkin. Mijozlarning mamnuniyati esa sohani yanada rivojlantirish kerakligidan dalolatdir.

Velosiped dunyo bo‘ylab eng keng tarqalgan transport turi bo‘lib, undan bir milliarddan ortiq aholi foydalanadi. Bunday mashhurlik boshqarish qulayligi, harakat xavfsizligi bilan bog‘liq bo‘lib, velosiped yirik shaharlarda tirbandliklardan tez o‘tib olishga yordam beradi. Bu afzalliklar esa kuryerlarni velosipeddan faol foydalanishga chaqiradi.

Velosipedda yuradigan xodim piyoda yuradigan xodimga qaraganda 2-2,5 baravar tezroq harakatlanadi, bu o‘z navbatida, buyurtmalar sonini 1,5 baravarga oshiradi va foyda ham ko‘payadi. Yetkazib berish xizmatlari uchun velosipeddan foydalanish boshqa transport turlariga qaraganda, bir qator afzalliklarga ega. Xususan, velosiped tejamkor, qulay, ekologik toza va sog‘liq uchun foydali hisoblanadi.

Mijozlar tezkorlikni qadrlaydi, velosiped esa tirbandlik va kollapsni chetlab o‘tib, manzilga tezda yetib boradi. Velosipeddagi kuryer har qanday tirbandlikdan o‘tib, tor yo‘laklar orqali marshrutlarni kesib, mahsulotni o‘z vaqtida yetkazib beradi.

SSP matbuot xizmati