Savdo-sanoat palatasi raisi Germaniyada qator uchrashuvlar o‘tkazdi

Joriy yilning 5-may kuni Germaniyaga tashrif doirasida Oʻzbekiston Savdo-sanoat palatasi raisi D.Vaxabov Turkiyaning “MUSIAD HESSEN” kompaniyasining Frankfurt shahridagi boʻlimi rahbari Muhsin Kidik bilan uchrashuv oʻtkazdi. Uchrashuv Oʻzbekiston Respublikasining Frankfurtmayndagi bosh konsulligi koʻmagida tashkillashtirildi.

“MUSIAD HESSEN” biznes hamjamiyatini qoʻllab-quvvatlovchi tashkilot boʻlgan “MUSIAD” Mustaqil sanoatchilar va tadbirkorlar uyushmasi tarkibiga kiradi.

Uchrashuv yakunida tomonlar yangi va quritilgan meva-sabzavot, qurilish materiallari va toʻqimachilik mahsulotlarini yetkazib berish boʻyicha hamkorlikni kengaytirishga kelishib oldi.

Germaniya tomoni hamkorlikni kengaytirish maqsadida Savdo-sanoat palatasi rahbariyatini ishbilarmonlik tadbirida ishtirok etish va Palata faoliyatiga doir taqdimot qilish taklifini berdi. 

Tadbir 2023-yil 25-iyunda Frankfurtda oʻtkazilishi rejalashtirilgan. Ushbu tadbirda ishtirok uchun qishloq ho’jaligi, qurilish materiallari hamda to’qimachilik mahsulotlarini ishlab chiqaruvchi tadbirkorlardan iborat delegatsiyani shakllantirish ko’zda tutilgan.

Shuningdek, O’zbekiston Savdo-sanoat palatasi raisi D.Vaxabov “Health Care People” va “The International People” kompaniyalari vakillari Nikolaus Rixter, Maykl Bestler va Tomas Forster bilan uchrashuv oʻtkazdi.

“Health Care People” –Germaniyadagi tibbiyot xodimlari uchun individual istiqbollarni yaratadi. Klassik hamshiralik xizmatlari yoki HR provayderlari taklif qila olmaydigan imkoniyatlar taqdim etiladi. Bu “TS Medical” va “TS Intensicare” kabi brendlarni birlashtirish gʻoyasi hisoblanadi.

“The International People” – Sharqiy Yevropaga (Polsha) mutaxassislarni joylashtirish, ehtiyojlarni tahlil qilish, deyarli barcha filiallarga (Ukraina va Oʻzbekiston) stajyorlarni joylashtirish va tayyorlash boʻyicha faoliyat olib boradi.

Uchrashuv yakunlari bo‘yicha tomonlar mehnat migratsiyasi yo‘nalishidagi hamkorlikni faollashtirish, gastronomik, tibbiy va boshqa xizmat ko‘rsatish yo‘nalishlarida amaliyot o‘tashni tashkil etish imkoniyatlarini ko‘rib chiqishga kelishib oldilar.

SSP matbuot xizmati