Fors-major holatlarini tasdiqlash tartibi toʼgʼrisida nizom qabul qilindi

Vazirlar Mahkamasi “Mahalliy xoʼjalik shartnomalari doirasida yuzaga keladigan yengib boʼlmaydigan kuch (fors-major) holatlarini tasdiqlash tartibi toʼgʼrisidagi nizomni tasdiqlash haqida”  (231-son, 07.06.2023 y.) qaror qabul qildi.

Nizomga koʼra, fors-major holatlar Savdo-sanoat palatasi raisining elektron raqamli imzosi bilan tasdiqlangan holda QR-kod (matrik shtrixli kod) bilan rasmiylashtiriladigan sertifikatni berish orqali tasdiqlanadi. 

• Talabgor fors-major holatlarni tasdiqlash boʼyicha sertifikat olish uchun Savdo-sanoat palatasiga toʼgʼridan-toʼgʼri yoki uning rasmiy veb-sayti orqali murojaat qiladi.
• Palata taqdim etilgan hujjatlarni 1 ish kunida koʼrib chiqadi. 
• Hujjatlarda kamchilik boʼlsa, talabgorga toʼliq taqdim etilmagan maʼlumot va hujjatlarni 10 kun ichida taqdim etish toʼgʼrisida soʼrov yuboriladi.
• Fors-major holatlar mavjudligini tasdiqlash yoki rad etish toʼgʼrisidagi qaror 15 kun muddatda qabul qilinadi.
• Sertifikat berish rad etilgan taqdirda, 3 kun muddatda talabgorga asoslantirilgan javob xati yuboriladi.
• Sertifikat rasmiylashtirilgan taqdirda, talabgorga 1 kun ichida maʼlum qilinib, sertifikat rasmiy veb-saytda eʼlon qilinadi. 
• Sertifikat muddatsiz davrga beriladi. Sertifikat bir martalik xususiyatga ega boʼlib, faqat arizada koʼrsatilgan shartnomaviy munosabatlarga nisbatan tatbiq etiladi.

Mazkur tartib tashqi savdo bitimlari va xalqaro shartnomalar shartlari doirasida yuzaga keladigan fors-major holatlarga nisbatan tatbiq qilinmaydi.

Hujjatni yuklab olish