Turkiy davlatlar Savdo-sanoat palatalari Ittifoqining navbatdan tashqari yig‘ilishi bo‘lib o‘tdi

Joriy yilning 3 iyul kuni Toshkent shahrida O‘zbekiston Savdo-sanoat palatasi tashabbusi bilan "Yangi O‘zbekiston: investitsiya va tadbirkorlikning yangi istiqbollari" mavzusida Turkiy davlatlar Savdo-sanoat palatalari Ittifoqining navbatdan tashqari yig‘ilishi bo‘lib o‘tdi.

Turkiy davlatlar Savdo-sanoat palatalari Ittifoqi Turkiy Savdo-sanoat palatasi negizida 2023-yilda tashkil etilgan bo‘lib, shu kungacha Turkiy davlatlar Savdo-sanoat palatalari Ittifoqi Bosh Assambleyasining birinchi yig‘ilishi bo‘lib o‘tdi. Ushbu palatalar Ittifoqi turk dunyosi mamlakatlari o‘zaro munosabatlarini va hamkorligini rivojlantirish maqsadida tashkil etilgan xalqaro platforma hisoblanadi. Bugungi kunda kengashga beshta davlat ─ Ozarbayjon, Qozog‘iston, Qirg‘iziston, Turkiya, O‘zbekiston a’zo bo‘lgan. Vengriya va Turkmaniston Ittifoqda kuzatuvchi davlat maqomiga ega.

Tadbirni O‘zbekiston Respublikasi Bosh vazirining o‘rinbosari Jamshid Xodjayev kirish so‘zi bilan ochib berdi, u o‘z chiqishida iqtisodiyotning barcha jabhalarida, jumladan, savdo, transport, energetika, qishloq xo‘jaligi, sanoat, shuningdek, davlatlararo munosabatlarni chuqurlashtirish muhimligi haqida, qolaversa, O‘zbekiston Turkiy Davlatlar Tashkilotiga a’zo davlatlar hamda kuzatuvchilar o‘rtasidagi hamkorlikni yanada rivojlantirish va mustahkamlashga o‘z hissasini qo‘shishda davom etishga tayyorligi to‘g‘risida ta’kidladi.

Shuningdek, tadbirda Turkiy investitsiya fondi prezidenti Bag‘dod Amreyev, Turkiy davlatlar tashkiloti bosh kotibi o‘rinbosari Omer Kochaman, O‘zbekiston Savdo-sanoat palatasi Prezidiumi raisi Adxam Ikromov, O‘zbekiston Savdo-sanoat palatasi raisi Davron Vaxabov, Ozarbayjon Respublikasi Tadbirkorlar (ish beruvchilar) tashkilotlari milliy konfederatsiyasi (ASK) prezidenti Mamed Musayev, Qirg‘iziston Respublikasi Savdo-sanot palatasining prezidenti Temir Sariyev, Turkiya Savdo-sanoat palatasi va savdo birjalari ittifoqi vitse-prezidenti Ali Korpuz, Qozog‘iston Respublikasi "Atameken" milliy tadbirkorlar palatasi raisinig maslahatchisi Murat Karimsakov va Turkmaniston Savdo-sanoat palatasining boshqarma boshlig‘i Kemal Veliyev ​​​​o‘z chiqishlari bilan ishtirok etdi.

Ishtirokchilar turkiy dunyo ishbilarmonlari nomidan so‘nggi yillarda biznes bilan shug‘ullanishga mamlakatda yaratilayotgan qulay investitsiya sharoitlar uchun O‘zbekiston rahbariyatiga minnatdorchilik bildirdi.

Shuningdek, so‘zga chiquvchilar Yangi O‘zbekistonda  izchillik va qatyatlilik bilan amalga oshirilayotgan islohatlar natijasida biznes  jadal rivojlanishi uchun  keng imkoniyatlar yaratilganligi, xorijiy  investitsiyalar uchun jozibadorlik keskin oshib, xorijiy kapital ishtirokidagi korxonalar soni qariyib to‘rt barobarga kupayganligini ta’kidlab o‘tishdi.

Yig‘ilishda Turkiy kengashga a’zo mamlakatlar tomonidan savdo-iqtisodiy, ishbilarmonlik aloqalarini yanada rivojlantirish, savdo, sanoat va tadbirkorlik sohalarida ikki va ko‘p tomonlama sheriklikni mustahkamlash masalalari bo‘yicha ma’ruzalari tinglandi. Turkiy Savdo-sanoat palatalari Ittifoqi faoliyatining asosiy yo‘nalishlari muhokama qilindi.

Turkiy Savdo-sanoat palatalari Ittifoqiga a’zo davlatlar o‘rtasida ko‘p tomonlama hamkorlikni, jumladan, savdo, investitsiya, transport, energetika, turizm, madaniy-gumanitar almashinuvni kengaytirishda ko‘maklashuvchi samarali platforma ekani ta’kidlandi.

Tadbir doirasida turkiy tilli davlatlar ishbilarmon doiralarining “B2B” shaklidagi uchrashuvlari ham bo‘lib o‘tdi.

SSP Matbuot xizmati