O‘zbekiston va Misr o‘rtasidagi hamkorlik istiqbollari muhokama qilindi

Joriy yilning 10 iyul kuni O‘zbekiston Savdo-sanoat palatasi raisi o'rinbosari Jamshed O'roqov, Misr Tadbirkorlar uyushmasi direktori Muhammad Yusuf va Misr Arab Respublikasining O‘zbekistondagi Favqulodda va muxtor Elchisi Amira Fahmi o'rtasida uchrashuv bo‘lib o‘tdi.

Uchrashuvda ikki mamlakat o'rtasidagi hamkorlik aloqalarini rivojlantirish masalalari muhokama qilindi, xususan, O‘zbekiston qishloq xo‘jaligi, tekstil va turizm sohalarida hamkorlikka tayyor ekanligi haqida ta'kidlandi.

Shuningdek, uchrashuv davomida O‘zbekiston Savdo-sanoat palatasining faoliyati va vazifalari bilan tanishtirildi. Misr Tadbirkorlar uyushmasi direktori Muhammad Yusuf O‘zbekistondagi zargarlik sanoati sohasini rivojlantirish hamda tajriba almashish maqsadida o'zbekistonlik zargarlarini Misrga tashrifini tashkillashtirish taklifini bildirdi.

Uchrashuvda O‘zbekiston va Misr Arab Respublikasi o‘rtasidagi iqtisodiy aloqalarni mustahkamlash maqsadida biznes-forum o‘tkazish imkoniyatlari ham muhokama qilindi.

SSP Matbuot xizmati