Transport va logistika yo‘nalishida yangi taklif va tashabbuslar

Joriy yilning 8 avgust kuni Toshkent shahrida Temir yo‘l va bojxona sohasidagi muammoli masalalar va ularning yechimi bo‘yicha takliflarni shakllantirish maqsadida ushbu yo‘nalishda faoliyat olib borayotgan tadbirkorlik subyektlari bilan uchrashuv bo‘lib o‘tdi.

Mazkur tadbir O‘zbekiston Savdo-sanoat palatasi raisi Davron Vaxabov olib bordi. Shuningdek davra suhbatida Bojxona qo‘mitasi raisining birinchi o‘rinbosari Ilxom Muxtorov hamda “O‘zbekiston temir yo‘llari” AJ boshqaruv raisi birinchi o‘rinbosari v.b Xikmatilla Raxmetov va “O‘zbekiston temir yo‘llari” AJ boshqaruv raisi o‘rinbosari v.b Abdumalik Kamildjanov, Prezident huzuridagi tadbirkorlikni qo‘llab-quvvatlash bo‘yicha jamoatchlik kengashi a’zolari hamda 100 nafardan ortiq tadbirkorlar ishtirok etishdi.

Ma’lumki, mamlakatimizda har yili 20 avgust kuni O‘zbekistonda “Tadbirkorlar kuni” keng nishonlanadi va ushbu sana munosabati bilan eng muhim va kutilayotgan voqea – davlat rahbarining tadbirkorlar bilan “ochiq muloqot” tadbiri bo‘lib o‘tadi.

Bu yil o‘tkaziladigan “ochiq muloqot” tadbiriga tayyorgarlik jarayonlarida biznes vakillarining muammolari va sohani rivojlantirishga qaratilgan takliflar ishlab chiqish yo‘nalishlaridan biri – aynan logistika masalasi hisoblanadi. 

Bugungi uchrashuvdan ko‘zlangan asosiy maqsad - O‘zbekiston Respublikasi Prezidentinig tadbirkorlar bilan “ochiq muloqot”i oldidan eksportyor korxonalar hamda tovarlarni bojxona hududida qayta ishlash rejimida faoliyat yuritayotgan tadbirkorlar duch kelayotgan muammolarni aniqlash, shuningdek bu borada yangi takliflarni o‘rganishdan iborat. 

Tadbirda sanoat mahsulotlari ishlab chiqarish quvvatlarini oshirish hamda tadbirkorlik subyektlari tomonidan mavjud ishlab chiqarish quvvatlaridan to‘liq foydalanishni ta’minlash, eksportni qo‘llab-quvvatlash uchun qulay shart-sharoitlar yaratish, tovarlarni bojxona hududida qayta ishlash rejimiga joylashtirish tartiblari muhokama qilindi.

Shuningdek, mahalliy tadbirkorlar tomonidan tovarlar eksporti uchun belgilangan bojxona yig‘imlari stavkalari, imtiyozlar, preferensiyalar va eksportni qo‘llab-quvvatlash bo‘yicha boshqa choralar, shu jumladan temir yo‘lda tashish tariflari, subsidiyalar va kompensatsiyalar “reeksport” bojxona rejimini yanada rivojlantirish borasida takliflar bildirildi.

SSP Matbuot xizmati