Port-Said shahrida O‘zbekiston Savdo-sanoat palatasining savdo uyini ochish masalalari muhokama qilindi

Joriy yilning 7 avgust kuni Savdo-sanoat palatasi Raisi Davron Vaxabov Port Said shahri gubernatori o‘rinbosari Said Amro Usmon va Port Said shahri Savdo-sanoat palatasi raisi Muhammad Saada bilan onlayn muzokaralar o‘tkazdi.

Shuningdek, muzokaralarda O‘zbekiston Respublikasining Misr Arab Respublikasidagi Favqulodda va muxtor elchisi M.Qilichev, O‘zbekistonning Misrdagi elchixonasi savdo attashesi Sh.Yoqubov hamda O‘zbekiston Savdo-sanoat palatasi vakillari ishtirok etdi.

Muzokaralar davomida O‘zbekiston tomonidan Port-Said shahrida O‘zbekiston Savdo-sanoat palatasining savdo uyini ochish masalasini ko‘rib chiqish taklifi bildirildi, bu o‘z navbatida, O‘zbekiston-Misr tovarlari va xizmatlarini import va eksport qilish uchun markaz bo‘lib xizmat qilishi mumkin. O‘z navbatida, Savdo-sanoat palatasining mazkur tashabbusi hayotga tatbiq etilishi natijasida, kelgusida O‘zbekistondan Afrika, Yevropa va Osiyo mamlakatlariga tovarlarni eksport qilish ham mumkin bo‘ladi.

Amr Usmon, o‘z navbatida, yuqoridagi loyihani amalga oshirishdan manfaatdor ekanini ta’kidlab, O‘zbekiston tovarlarini Port-Said orqali Misr, Afrika va Yevropaga olib kirish eng maqbul variant ekanligini ta’kidladi, chunki Port Saidda logistika uchun barcha zarur sharoitlar, jumladan, omborxona, transport kommunikatsiyalari va xorijiy investitsiyalar uchun imtiyozlar mavjudligi to'g'risida ham aytib o'tdi. Bundan tashqari, tovar va xizmatlar importi, eksporti va reeksportida muhim rol o‘ynaydigan maxsus investitsiya qonuni va Maxsus iqtisodiy zona mavjud ekanligini qayd etdi.

Muzokaralar yakunida Amr Usmon Port-Said gubernatorligi SSP Savdo uyini tashkil etish tashabbuslarini amalga oshirish uchun har tomonlama yordam berishga tayyorligi haqida ta’kidladi.

Muhammad Saada O‘zbekiston Savdo-sanoat palatasining Misrda savdo uyini ochish niyatini yuqori baholadi va Sharqiy Port Said logistika, tranzit va boshqa imtiyozlarni hisobga olgan holda tovarlar importi va eksporti uchun eng jozibador shahar ekanligini ma’lum qildi.

Uchrashuv yakunlari bo‘yicha tomonlar savdo uyini tashkil etish bo‘yicha barcha masalalarni atroflicha o‘rganish va loyihani ishga tushirish maqsadida qo‘shma ishchi guruh tuzish kelishuviga erishdi.

SSP Matbuot xizmati