Jamoatchilik kengashining navbatdagi yigʼilishi bo'lib o'tdi

Joriy yil 14-avgust kuni Savdo-sanoat palatasi binosida Oʼzbekiston Respublikasi Prezidenti huzuridagi tadbirkorlikni qoʼllab-quvvatlash boʼyicha Jamoatchilik kengashining navbatdagi yigʼilishi bo'lib o'tdi.

Unda Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda O‘zbekiston Savdo-sanoat palatasi tomonidan tadbirkorlar faoliyatidagi tekshiruvlar bo‘yicha ishlab chiqilgan takliflar tadbirkorlar va mutasaddi davlat tashkilotlari vakillari ishtirokida ko‘rib chiqildi.

Mazkur yig‘ilishda tadbirkorlar tomonidan nazorat qiluvchi organlar tomonidan tekshiruv tashabbusi bilan chiqish va oʻtkazish hususida yangi tizim joriy qilish boʻyicha quydagi takliflar berildi:

- Barcha tekshiruvlarni 3 ta toifaga ajratish: Biznes-ombudsman bilan kelishish tartibidagi, Biznes-ombudsmanni oldindan xabardor qilish tartibidagi, tekshiruv yakuni boʻyicha xabardor qilish tartibida oʻtkaziladigan tekshiruvlar;

- sayyor soliq tekshiruvida “bodi-kamera”dan majburiy foydalanish talabini joriy etish;

- nazorat qiluvchi organlar tizimida kamida ikki yil mehnat stajiga ega masʼul xodimlar tadbirkorlar faoliyatini tekshirish vakolatiga ega boʻlishi mumkinligini qonunchilikda qatʼiy belgilab qoʻyish;

- nazorat qiluvchi organlar xodimlari uchun Biznes-ombudsman tomonidan yilda kamida bir marotaba 1 haftalik majburiy oʻqitish tartibini joriy qilish;

- tekshiruvga yuboriladigan xodimni soliq rahbari tomonidan belgilash amaliyotini bekor qilib, uni inson omilisiz, avtomatlashgan tizim orqali aniqlash va boshqa bir qator tizimli takliflar bildirildi.

Yig‘ilish yakunida mazkur takliflar belgilangan tartibda mutasadi tashkilot vakillari bilan o‘rganib chiqilib, Oʻzbekiston Respublikasi Prezidenti Administratsiyasiga kiritilishi belgilandi.

SSP matbuot xizmati