Hududiy biznes inkubatorlarning faoliyatini takomillashtirish maqsadida amaliy seminar o‘tkazildi

Joriy yilning 22 avgust kuni Savdo-sanoat palatasida “Farg‘ona vodiysida qishloq tadbirkorligini rivojlantirish” loyihasi doirasida hududiy biznes inkubatorlarning faoliyatini takomillashtirish maqsadida amaliy seminar o‘tkazildi.

Mazkur seminar O‘zbekiston Savdo-sanoat palatasi raisining birinchi o‘rinbosari Islom Jasimov va loyiha rahbari Saidkomil Saidnazarxanov boshchiligida o‘tkazilib, unda hududiy biznes inkubatorlarning menedjer va menedjer yordamchilari ishtirok etdi.

O‘zbekiston Respublikasi Prezidentining 2019-yil 19-iyuldagi "Xalqaro tiklanish va taraqqiyot banki ishtirokida "Farg‘ona vodiysida qishloq tadbirkorligini rivojlantirish" loyixasini amalga oshirish chora-tadbirlari to‘g‘risida"gi PQ-4399-son qarori ijrosini ta’minlash maqsadida O‘zbekiston Savdo-sanoat palatasi tomonidan Farg‘ona, Andijon va Namangan viloyatlarining 9 ta tuman va shaharlarida Hududiy Biznes-inkubatorlar tashkil etilgan.

Hududiy Biznes-inkubatorlar (HBI) tadbirkorlik faoliyati bilan shug‘ullanish istagida bo‘lgan fuqarolar va o‘z faoliyatini yo‘lga qo‘ygan tadbirkorlik subyektlari uchun o‘quv kurslarni tashkil etish, zarur axborotlarni olish va amaliy masalalarni hal etishda eksport, huquqiy va maslahat yordami berish faoliyatini ko‘rsatadi.

HBIning asosiy maqsadi Farg‘ona vodiysida qishloq tadbirkorligini qo‘llab-quvvatlagan holda uni yanada rivojlantirish va shu tariqa, yangi ish o‘rinlarini yaratishdan iborat.

SSP Matbuot xizmati