Islom Savdo-sanoat va qishloq xo‘jaligi palatasi Bosh kotibi bilan uchrashuv bo‘lib o‘tdi

Joriy yilning 29-avgust kuni O‘zbekistonning Misrdagi elchixonasi ko‘magida Savdo-sanoat palatasi raisining birinchi o‘rinbosari Islom Jasimov va Islom savdo-sanoat va qishloq xo'jaligi palatasi Bosh kotibi Yusef Xalavi o‘rtasida uchrashuv bo‘lib o‘tdi.

Islom savdo-sanoat va qishloq xoʻjaligi palatasi 1976 yilda Islom hamkorlik tashkiloti shafeligida tashkil etilgan boʻlib, Islom hamkorlik tashkilotiga aʼzo mamlakatlarda xususiy musulmon tadbirkorligini rivojlantirishga koʻmaklashish maqsadida tuzilgan. Palata Kengashi 18 kishidan iborat bo'lib, Karachi, Qohira va Istanbulda filiallarga ega. Islom Savdo-sanoat va qishloq xoʻjaligi palatasining barcha musulmon mamlakatlari uchun Arbitraj markazi esa Istanbulda joylashgan.

Uchrashuv davomida I.Jasimov O‘zbekiston Savdo-sanoat palatasining faoliyati va vazifalari, shuningdek, O‘zbekiston Respublikasi Prezidentining kichik, o‘rta va yirik biznesni rivojlantirishga qaratilgan siyosati va O‘zbekiston hukumatining mamlakatimizda tadbirkorlikni yanada rivojlantirish yo‘lida amalga oshirayotgan amaliy qadamlari to‘g‘risida aytib o‘tdi.

Shuningdek, I.Jasimov joriy yilning 18-avgust kuni bo‘lib o‘tgan Davlatimiz rahbarining tadbirkorlar bilan uchinchi ochiq muloqotida soliq, moliya va boshqa sohalarda tadbirkorlar faoliyatini takomillashtirishga qaratilgan muhim o‘zgarishlar e’lon qilinganligi haqida qayd etdi. Jumladan, tadbirkorlarga loyihalarni kreditlashda imtiyozli shart-sharoitlar yaratish maqsadida “Qishloq qurilish banki” endilikda “Biznesni rivojlantirish banki” bo‘lishi kutilayotgani to‘g‘risida ham ma’lumot berdi va shu munosabat bilan o‘zbekistonlik tadbirkorlarni islomiy kreditlash shartlari qiziqtirayotgani haqida ta'kidladi.

Bu masala boʻyicha Yusef Xalavi oʻzini "Al Baraka" Islom iqtisodiyoti forumi Bosh kotibi ekanligi to'g'risida ma'lum qildi va 2023-yil 1-oktabr kuni Qohirada konferensiya oʻtkazilishi kutilayotganini, unda islomiy kreditlash masalalari ham muhokama qilinishini taʼkidladi.

Shuningdek, Yusef Xalavi Islom Savdo-sanoat va qishloq xo‘jaligi palatasi kuchli tahliliy-axborot bazasiga ega bo‘lib, u dunyoning barcha mamlakatlarining texnik-iqtisodiy tahlillarni olib borishi to‘g‘risida ma’lumot berdi. U ushbu xizmatlar Islom savdo-sanoat va qishloq xo‘jaligi palatasi a'zolari uchun bepul ekanligini va bundan manfaatdor mamlakatlardagi potensial investorlarga yordam berishi haqida ham aytib o'tdi.

Yusef Xalavi O‘zbekiston Savdo-sanoat palatasi bilan Islom Savdo-sanoat va qishloq xo‘jaligi palatasi o‘rtasida tegishli bitim imzolanishi maqsadga muvofiqligini ta’kidladi hamda O‘zbekiston Savdo-sanoat palatasiga Islom Savdo-sanoat va qishloq xo‘jaligi palatasiga a’zo bo’lish taklifini berdi.

SSP Matbuot xizmati