Istanbulda "O’rta koridor" loyihasi boʼyicha koʼrgazma-yarmarka hamda biznes forumlar boʼlib oʼtdi

Joriy yilning 15-17 sentyabr kunlari Turkiyaning Istanbul shahridagi "Istanbul Fuar Markazi"da davlatlar oʼrtasida tovar ayriboshlash va mahsulotlar yetkazishning yangi yoʼnalishlariga bagʼishlangan "O’rta koridor" loyihasi boʼyicha koʼrgazma-yarmarka hamda biznes forumlar boʼlib oʼtdi.

Maʼlumot uchun, "Oʼrta koridor" loyihasining marshruti Markaziy Osiyoni Kavkaz orqali Turkiyaga va Yevropa mamlakatlariga mahsulotlar yetkazish imkoniyatiga ega boʼlgan tizim hisoblanib, ushbu koridor orqali yillik 600 mlrd. dollarlik tovarlarning aylanishiga imkoniyat mavjud. 

Ushbu loyiha doirasida oʼtkazilgan koʼrgazmada Oʼzbekiston vakillari ham ishtirok etayotgan boʼlib, uning ikkinchi kunida Savdo-sanoat palatasi raisining birinchi urinbosari I.Jasimov "Oʼrta koridor" loyihasining Oʼzbekiston tadbirkorlari uchun afzalliklari, bu orqali mahalliy tadbirkorlarga yaratiladigan imkoniyatlar borasida maʼruza qildi.

Koʼrgazmada Oʼzbekiston tadbirkorlari tomonidan ishlab chiqarilgan mahsulotlar koʼrgazmasi tashkil qilingan boʼlib, ishtirokchilar va tashrif buyuruvchilarda katta qizikish uygʼotdi. 

Shuningdek, tadbir doirasida Oʼzbekistondan tashrif buyurgan tadbirkorlarning hamkorlar topish va faoliyatini kengaytirish boʼyicha B2B uchrashular ham oʼtkazildi. 

SSP Matbuot xizmati