Turkiy davlatlar ittifoqi Savdo-sanoat palatalari Bosh kotibi tashrifi doirasida bir qator uchrashuvlar tashkil etilmoqda

Turkiy davlatlar ittifoqi Savdo-sanoat palatalari Bosh kotibi Adem Kulaning va “DGpays Fintech” Xalqaro turk moliyaviy texnologiya kompaniyasi bosh direktori Ahmet Kayhanning mamlakatimizga tashrifi doirasida bir qator uchrashuvlar tashkil etildi.

DGpays - innovatsion elektron toʻlov yechimlarini ishlab chiqish va yetkazib berishga ixtisoslashgan toʻlov texnologiyasi kompaniyasidir. Kompaniya keng ko'lamli xizmatlarni taklif etadi, jumladan, to'lovlarni qayta ishlash, risklarni boshqarish, hamkorlar va mijozlar uchun dasturiy ta'minotni ishlab chiqish, integratsiya va boshqalar.

Jumladan, Savdo-sanoat palatasi tomonidan joriy yilning 18-sentyabr kuni O‘zbekiston banklari assotsiatsiyasi rahbari Baxtiyor Xamidov, shuningdek, davlat va tijorat banklari hamda "O'zbekiston pochtasi" vakillari, mobil aloqa operatorlari va tegishli sohadagi kompaniyalar bilan uchrashuvlar tashkillashtirildi.

Uchrashuvlarda ikki tomonlama hamkorlik istiqbollari muhokama qilinib, turkiyalik tadbirkorlar tomonidan DGpays kompaniyasi faoliyati haqida taqdimotlar o‘tkazildi va kompaniya to'g'risida batafsil ma'lumotlar berildi.

Shuningdek, O'zbekiston Savdo-sanoat palatasi va O‘zbekiston banklari assotsiatsiyasi DGpays kompaniyasi rahbariyati bilan yurtimiz tashkilotlari va banklariga turkiyalik mutaxassislarni jalb qilgan holda seminar va o'quv kurslarini tashkillashtirishga kelishib oldilar.

SSP Matbuot xizmati