O‘zbekiston va Turkiya o‘rtasida moliyaviy texnologiyalar sohasidagi hamkorlik istiqbollari muhokama qilindi

Joriy yilning 20-sentyabr kuni Savdo-sanoat palatasi raisining birinchi o'rinbosari Islom Jasimov Turkiy davlatlar ittifoqi Savdo-sanoat palatalari Bosh kotibi Adem Kula hamda “DGpays Fintech” Xalqaro turk moliyaviy texnologiya kompaniyasi bosh direktori Ahmet Kayhan bilan uchrashuv o'tkazdi.

Uchrashuvda delegatsiya aʼzolari DGpays kompaniyasi faoliyati to'g'risida, shuningdek, mamlakatimizdagi uch kunlik tashrifi davomida erishilgan kelishuvlar haqida maʼlumotlar berib, mazkur kelishuvlarni amalga oshirishda hamda yangi va ishonchli hamkorlar topishda Savdo-sanoat palatasidan amaliy yordam soʻradi.

DGpays - innovatsion elektron toʻlov yechimlarini ishlab chiqish va yetkazib berishga ixtisoslashgan toʻlov texnologiyasi kompaniyasidir. Kompaniya keng ko'lamli xizmatlarni taklif etadi, jumladan, to'lovlarni qayta ishlash, risklarni boshqarish, hamkorlar va mijozlar uchun dasturiy ta'minotni ishlab chiqish, integratsiya va boshqalar.

Islom Jasimov delegatsiya a’zolariga mamlakatimizga tashrifi va O‘zbekiston tadbirkorlari bilan hamkorlikka qiziqish bildirgani uchun minnatdorlik bildirdi hamda Savdo-sanoat palatasi ikki davlat oʻrtasidagi hamkorlikni rivojlantirishda ko'mak berishga tayyor ekanligini ta’kidladi.

SSP Matbuot xizmati