Тошкент шахри ва Фарғона вилоятида Ўзбекистон-Корея бизнес-форуми ўтказилди.

Жорий йилнинг 5-8 март кунлари Корея Республикасидаги Ўзбекистон Республикаси Элчихонасининг фахрий консули, «Evergeen Motor Group» раиси Ким Чанг Кён бошчилигида Корея Республикаси ишбилармон доира вакиллари делегацияси ташриф буюрди. 

Мазкур ташриф доирасида 2018 йил 7 март куни Ўзбекистон Савдо-саноат палатаси томонидан икки давлат тадбиркорлари иштирокидаги Ўзбекистон-Корея бизнес-форуми ва кооперация биржаси ўтказилди. Ушбу тадбир ишбилармонлик ҳамкорлигини ривожлантириш, шунингдек қўшма лойиҳаларни амалга ошириш мақсадида чет эл инвестицияларини жалб қилиш учун қўшимча рағбат сифатида хизмат қилади.

Тадбирни ташкил этишдан кўзланган асосий мақсад икки давлат тадбиркорлари ўртасида савдо алоқалари йўлга қўйилиши ва кенгайишини қўллаб-қувватлаш, янги қўшма корхоналар сонини ҳамда икки томонлама маҳсулот айланмасини оширишдан иборат.

Форумда қурилиш, озиқ-овқат саноати, савдо, тиббиёт, қишлоқ хўжалиги, текстил, энергетика, кимё саноати, машинасозлик, АКТ, қадоқлаш материаллари, тўқимачилик, логистика, мева-сабзавот маҳсулотларини қайта ишлаш ҳамда тайёр маҳсулотларни чиқариш, туризм каби соҳаларда фаолият юритаётган Жанубий Кореянинг йирик компанияларидан келган 150 дан ортиқ вакил, шунингдек, Ўзбекистон Республикасининг турли вилоятларида жойлашган йирик корхоналар ва компанияларнинг 200 яқин вакиллари иштирок этишди.

Ишбилармонлик учрашуви чоғида икки давлат тадбиркорлари ўртасидаги ўзаро ҳамкорликни мустаҳкамлаш бўйича масалалар муҳокама қилинди.

Бизнес форум доирасида икки мамлакат ишбилармон доира вакиллари иштирокида кооперацион биржа хам ўтказилди. 

Қайд этиш керакки, Ўзбекистон Марказий Осиё давлатлари ичида Кореянинг асосий савдо ҳамкори ҳисобланади, жумладан Корея Республикасининг минтақа давлатлари билан маҳсулот айланмаси ҳажмининг ярмидан ортиғи Ўзбекистон улушига тўғри келади.

Асосий экспорт позициялари: транспорт, қурилиш ва туризм хизматлари, пахта толаси, пластмасса ва ундан ясалган буюмлар, қурилиш материаллари, толали масса.

Импорт позициялари: автотранспорт воситаларининг қисмлари, механик ва электр ускуналари, пластмасса ва ундан ясалган буюмлар, қорма металлдан ишланган буюмлар, кимёвий маҳсулотлар, резина маҳсулотлари ва ҳ.к.

Бугунги кунда Ўзбекистон Республикасида корейс капитали иштирокидаги 460 дан ортиқ корхона фаолият юритмоқда (386 та қўшма корхона ва 75 та 100% корейс капиталига эна корхона). Ўзбекистонда 75 та корейс компаниясининг ваколатхонаси аккредитациядан ўтган.

Ушбу компаниялар фаолиятининг асосий йўналишлари: нефтгаз, нефткимё ва кимё соҳалари, қазиб чиқариш, машинасозлик, электр техник, тўқимачилик, ахборот-коммуникация технологиялари, транспорт ва логистика, туризм, қурилиш материалларини ишлаб чиқариш, қишлоқ хўжалиги маҳсулотларини қайта ишлаш ва бошқалар.

ЎзССП Ахборот хизмати