Малайзия ишбилармонлари билан ҳамкорлик алоқалари кенгаймоқда

2022 йил 13 апрель куни Ўзбекистоннинг Малайзиядаги элчихонаси, Ўзбекистон Савдо-саноат палатаси ҳамда маҳаллий экспортёр корхоналар иштирокида Малайзиянинг “GT Spice Manufacturers”  компанияси билан онлайн учрашув бўлиб ўтди.

Онлайн видеомулоқот кўринишида ўтказилган учрашувда Ўзбекистон Савдо-саноат палатаси Экспортга кўмаклашиш бошқармаси Ғ.Усмонов сўзга чиқиб, республикамизда Малайзия компаниялари шу жумладан  “GT Spice Manufacturers”  билан ҳамкорлик қилишга қизиқиши юқори эканлигини ҳамда республикамиздан Малайзияга экспорт қилиш салоҳияти тўғрисида батафсил тўхталиб ўтди.

Хусусан, қуруқ мева, озиқ-овқат, қишлоқ хўжалиги, айниқса доривор ва зиравор маҳсулотларини экспорт қилиш имконияти юқори эканлиги таъкидланди.

Ўз навбатида Малайзия компанияси ўзининг фаолияти тўғрисида қисқача маълумот бериб, республикамиз ишбилармонлари билан экспорт, импорт ҳамда республикамизда озиқ-овқат йўналишида  қўшма лойиҳаларни амалга оширишга қизиқиши борлигини маълум қилди.

Учрашув давомида маҳаллий тадбиркорлик субъектларининг экспортбоп маҳсулотлар борасидаги тақдимотлари эшитилди.

Музокаралар якунида Малайзия корхонаси эҳтиёжи учун республикамиздан Малайзияга қишлоқ хўжалиги ва қуруқ мева маҳсулотлари экспортини ташкил этиш, Ўзбекистоннинг хусусий корхоналари билан ўзаро манфаатли ҳамкорликни ўрнатиш имкониятларини кўриб чиқишга ҳамда Малайзия компанияси билан Ўзбекистонда экспортга мўлжалланган озиқ-овқат маҳсулотлари ишлаб чиқарадиган қўшма корхона тузиш масаласини ўрганиб чиқишга келишиб олинди.