O'zbekiston-Qozog'iston biznes-forumi

Joriy yilning 19 oktyabr kuni har yilgi O'zbekiston-Qozog'iston biznes-forumi va kooperatsiya birjasi bo'lib o'tdi.

Mazkur tadbirlarning tashkilotchilari sifatida o'zbek tomonidan O'zbekiston Respublikasi Savdo-sanoat palatasi, qozoq tomonidan esa - «KAZAKH INVEST» Milliy kompaniyasi hamda Qozog'iston Respublikasi Investitsiyalar va rivojlantirish vazirligi ishtirok etmoqda.

Tadbirda Qozog'istonning mashinasozlik, qurilish, oziq-ovqat, farmatsevtika, kimyo, qadoqlash, yengil sanoat kabi sohalarida faoliyat yuritayotgan 30 dan ortiq kompaniyasi qatnashadi.

Ushbu kompaniyalarning mahsulotlari yengil avtomobillar, elektr qozonlar, transformatorlar, metall cherepitsalar, alyumin profillar, sement, lak-bo'yoq materiallari, quvurlar va fitinglar, moy, un, shrot, muzlatilgan baliq, dori vositalari, kaustik soda va boshqalardan iborat.

Aytib o'tilgan tadbirlarni o'tkazishdan maqsad ikki davlat tadbirkorlari o'rtasida savdo aloqalarini yo'lga qo'yish va kengaytirishga ko'maklashish, yangi qo'shma korxonalarni ishga tushirish va ikki tomonlama mahsulot aylanmasini oshirishdan iborat.

Bugungi kunda O'zbekistonda Qozog'iston kapitali ishtirokidagi 200 dan ziyod kompaniya faoliyat yuritadi. O'tgan yil yakunlariga ko'ra davlatlar orasidagi mahsulot aylanmasining hajmi 2 mlrd. AQSH dollarini tashkil etdi. Tomonlar bu ko'rsatkichni 5 mlrd. AQSH dollariga yetkazishni ko'zlamoqda.

Qayd etish kerakki, shu yilning mart oyida Astanada hamda 16 sentyabrda Toshkentda bo'lib o'tgan ikkita biznes-forum yakunlari bo'yicha O'zbekiston va Qozog'iston o'rtasida umumiy qiymati 1,2 mlrd. AQSH dollariga teng shartnomalar imzolandi.

O'zbekiston Respublikami va Qozog'iston Respublikasi o'rtasidagi hamkorlik ko'p asrlik do'stona qo'shnichilik, do'stlik va o'zaro hurmat an'analari bilan bog'langan ikki xalqning tub manfaatlariga xizmat qilib, iqtisodiy taraqqiyot sohasida yangi savdo yo'li yaratilishini nazarda tutadi. Ikki davlatning biznes doiralari o'rtasidagi aloqalar hamda madaniy-gumanitar munosabatlarning yanada kengayishi ikki davlatning qardosh xalqlari o'rtasidagi do'stlik hamda qo'shnichilikni mustahkamlashga qo'shimcha kuch bag'ishlaydi.

Biznes forum va kooperatsion birja doirasida AO "Alageum Electric" bilan xamkorlik memorandumi va TOO "Sieger WDF" bilan tovar yetkazib berish shartnomasi imzolandi.

O'zSSP Axborot xizmati