Normativ-huquqiy hujjatlar loyihalariga Xulosa berish Savdo-sanoat palatasi faoliyatining diqqat markazida.

O'zbekiston Respublikasi Prezidentining 2017 yil 19 iyundagi “Biznesning qonuniy manfaatlari davlat tomonidan muhofaza qilinishi va tadbirkorlik faoliyatini yanada rivojlantirish tizimini tubdan takomillashtirishga doir chora-tadbirlar to'g'risida”gi PF-5087-sonli Farmonining 5-bandiga asosan O'zbekiston Respublikasi Savdo-sanoat palatasi me'yoriy-huquqiy hujjatlar loyihalarining tadbirkorlik faoliyatiga ta'sirini baholash to'g'risidagi xulosani berish bo'yicha vakolatli organ etib belgilangan. 
Ushbu vazifani bajara borib, Savdo-sanoat palatasi tomonidan bir qator huquqiy normativ hujjatlar loyihalari o'rganib borilib, ular bo'yicha ekspert xulosalari tuzib borilmoqda.
Ushbu mexanizm tadbirkorlar huquqlarini himoya qilish borasidagi kafolatlarni yanada kuchaytirilishida muhim ahamiyatga ega ekanligini e'tiborga olib, loyihalarning aksariyati tadbirkorlar ishtirokida o'tkaziladigan Ekspertlar kengashida muhokama etilmoqda.
Eng muhimi, Palataning xulosalari e'tiborga olinib, loyihalar qayta ko'rib chiqilmoqda.
Xususan, Palata tomonidan 2018 yil davomida 265 ta normativ-huquqiy hujjat loyihalari ko'rib chiqilib, ular bo'yicha Xulosalar berildi.
Misol uchun, O'zbekiston Respublikasi Vazirlar Mahkamasi huzuridagi Ta'lim sifatini nazorat qilish davlat inspeksiyasi tomonidan ishlab chiqilgan O'zbekiston Respublikasining “Ta'lim to'g'risida”gi (yangi tahrir) Qonuni loyihasi yuzasidan fuqarolarga ta'lim, tarbiya berish, kasb-hunar o'rgatishning huquqiy asoslarini belgilashda sog'lom raqobat muhitini shakllantirish uchun an'anaviy ta'lim xizmatlari bilan bir qatorda sifatli va ommabop ta'lim olishning muqobil imkoniyatlarini yaratadigan pullik ta'lim xizmatlari ko'rsatish tartibini aniq belgilash, shuningdek ularni xususiy va ijtimoiy sheriklik asosida tashkil etish mexanizmini chiqarib tashlash, nodavlat ta'lim xizmatlari ko'rsatish faoliyati bilan shug'ullanuvchi yuridik shaxslar tomonidan davlat ta'lim standartlari va davlat talablarining bajarilishini nazorat qilishda nazorat qiluvchi sub'ektlar sonini qisqartirishni nazarda tutuvchi Xulosa berildi.
Yoki Sog'liqni saqlash vazirining “Dori vositalarining qo'llanilishi chog'ida nojo'ya reaksiyalar aniqlangan holatlar to'g'risida xabardor qilish tartibi to'g'risidagi nizomni tasdiqlash haqida”gi Buyrug'i loyixasi yuzasidan dorixonalar va dori ishlab chiqaruvchi korxonalar, jumladan xorijiy ishlab chiqaruvchilar o'zlari sotgan yoki ishlab chiqargan dori vositalarining nojo'ya reaksiyalar keltirib chiqarganligi to'g'risida ma'lumotga ega bo'lmay turib Davlat markazini xabardor qilish imkoniyatiga ega emasligi va  dori vositasini muomaladan chiqarish yoki uning qo'llanilishini to'xtatib turishning aniq asoslari va mexanizmlarini loyihada ko'rsatilmaganligi amaliyotda har qanday noaniqliklar, suiste'molliklar va korrupsiya holatlariga olib kelishi mumkinligi to'g'risida Xulosa tuzilib, loyiha muallifiga yuborildi.
Xuddi shunday, “O'zstandart” agentligi tomonidan tayyorlangan O'zbekiston Respublikasi Vazirlar Maxkamasining “Kommunal xizmatlar ko'rsatish tizimini takomillashtirishga doir qo'shimcha chora-tadbirlar to'g'risida”gi Qaror loyixasi yuzasidan priborni tekshiruvdan o'tkazishga qabul qilishni rad etishga olib keladigan sabablaridan biri, ya'ni “shikastlangan holatda bo'lishi” ning belgilari aniq ko'rsatib o'tilmaganligi hamda hisobga olish priborini tekshiruvdan o'tkazishga qabul qilishni rad etish ustidan shikoyat qilish imkoniyati iste'molchiga berilmaganligi to'g'risida Xulosa shular jumlasidan.
Ushbu xulosalarni berishda, eng avvalo, ishbilarmonlik muhitiga salbiy ta'sir ko'rsatishi mumkin bo'lgan normalarni me'yoriy-huquqiy hujjatlar loyihalaridan chiqarib tashlash va bu orqali ularning tadbirkorlik faoliyatiga ta'sirini oldini olish nazarda tutildi.
Bu boradagi ish davom etmoqda.