“Yoshlar - kelajagimiz” Davlat dasturi ijroda

O'zbekiston Respublikasi Prezidentining “Yoshlar – kelajagimiz” Davlat dasturi to'g'risida”gi Farmoniga muvofiq, 2018 yil 1 iyuldan boshlab, respublikaning barcha tuman (shahar)larida “Yoshlar – kelajagimiz” Davlat dasturi amalga oshirilishi, davlat dasturi doirasida O'zbekiston yoshlar ittifoqi huzurida “Yoshlar - kelajagimiz” jamg'armasi, shuningdek, uning tuman va shahar filiallari tashkil etilishi belgilab berilgandi.

Farmonda yuklatilgan vazifalarni bajarish maqsadida tuzilgan Respublika va hududiy ishchi guruhlari tomonidan uyma-uy yurilib, yoshlarning muammolari, takliflari o'rganilmoqda. Hisobotlarga ko'ra respublika bo'yicha 14 yoshdan 30 yoshgacha bo'lgan yoshlar 9 922,2 ming nafarni tashkil qiladi.

Qorakalpog'iston Respublikasi Vazirlar Kengashi, Toshkent shaxar va viloyatlar xokimliklari, prokuratura, ichki ishlar, solik, iqtisodiyot, moliya, mehnat, qurilish boshqarmalari, Yoshlar ittifoqi va o'zini o'zi boshkarish organlari, Savdo-sanoat palatasi, tijorat banklari hamda boshqa idoralar raxbarlari va xodimlaridan iborat tarkibda 214 ta shtab va tuman-shahar komissiyalari,  8 993 ta mahalla kesimida 5 108 ta idoralararo ishchi guruhlari tashkil etilgan.

Bugungi kunga qadar Davlat dasturi ijrosi doirasidagi tashkiliy tadbirlar davomida:

Joriy yilning 18 iyul kuni “Yoshlar – kelajagimiz” Jamg'armasi Adliya vazirligida davlat ro'yxatidan o'tkazildi va 20 iyul kuni Tashqi iqtisodiy faoliyat Milliy bankida hisob raqami ochildi;
“Yoshlar mehnat guzari”ni tashkil etish maqsadida respublika bo'yicha 1 789 ta bo'sh turgan bino va yer uchastkalarining aniq manzilli ro'yxati shakllantirildi;
yoshlarning tadbirkorlik faoliyatiga ko'maklashish maqsadida 115 ta tumanda “Yosh tadbirkorlar” kovorking markazlari uchun yer maydonlari ajratildi, hozirda ularning 2 tasi ishga tushirildi;
yoshlarning biznes tashabbuslari, startaplari, g'oyalari va loyihalari O'zbekiston Respublikasi Savdo-sanoat palatasi tomonidan moliyalashtiruvchi tijorat banklari bilan birgalikda namunaviy biznes-rejalar ishlab chiqildi;
Davlat dasturini amalga oshirish bo'yicha bir qator Nizomlar va tartiblar loyihalari ishlab chiqildi.
“Yoshlar – kelajagimiz” Davlat dasturi borasidagi ishlar jadal suratlarda davom ettirilmoqda.

O'z SSP Matbuot xizmati