Toshkentda Oʻzbekiston-Misr biznes-forumi boʻlib oʻtadi

2018-yil 5-sentabr kuni Misr Arab Respublikasi Prezidenti Abdul-Fattah Said Huseyn Halil As-Sisining Oʻzbekiston Respublikasiga rasmiy tashrifi doirasida Toshkentda Oʻzbekiston-Misr biznes-forumi va B2B formatida kooperatsion birja tashkil etiladi.

Tadbirlarda ikki davlat ishbilarmonlar va biznes doiralari vakillari ishtirok etadilar. Biznes forum va kooperatsion birja yakunlariga koʻra turizm, farmatsevtika, elektrotexnika va boshqa sohalarga oid oʻzaro manfaatli investitsion va savdo kelishuvlarini imzolash rejalashtirilgan. Shuningdek, biznes forum doirasida Oʻzbekistonda meva-sabzavot va logislika xabini tashkil etish masalalari muhokama etiladi.

Maʼlumot uchun: Oʻzbekiston Respublikasi va Misr Arab Respublikasi oʻrtasida diplomatik aloqalar 1992-yil 23-yanvar kuni oʻrnatilgan.

Investitsiyalarni ragʻbatlantirish va himoya qilish toʻgʻrisida (Kair, 1992-yil 16-dekabr), iqtisodiy va ilmiy-texnik hamkorlik toʻgʻrisida (Kair, 1992-yil 16-dekabr), ikki tomonlama soliqqa tortishning oldini olish va daromad soligʻini toʻlashdan boʻyin tovlashning oldini olish toʻgʻrisida (Kair, 1992-yil 21-sentabr) hamda savdo toʻgʻrisidagi (Toshkent, 2001-yil 19-iyun) hukumatlararo kelishuvlar ikkitomonlama savdo-iqtisodiy hamkorlikning huquqiy asosi boʻlib xizmat qiladi.

O'z SSP Matbuot xizmati