Tabiiy toshlarni qayta ishlash loyihasini amalga oshirish bo‘yicha investitsion taklif

O‘zbekiston Savdo-sanoat palatasi Italiyaning  «Dazzini Machine», «Bennetti Machine» va «Pedrini»  kompaniyalari tomonidan respublikamiz hududida tabiiy toshlarni ishlab chiqarish bo‘yicha qo‘shma loyihani amalga oshirish uchun mahalliy tadbirkorlik sub’ektlari bilan hamkorlik qilish taklifini bildirganligini ma’lum qiladi.

Jumladan, Italiya kompaniyalari ushbu loyihani respublikamiz hududida amalga oshirish uchun mahalliy tadbirkorlik sub’ektlaridan quyidagi ma’lumotlarni taqdim etishlarini so‘ramoqdalar:

Hamkorlik qilish istagida bo‘lgan mahalliy tadbirkorlik sub’ektining loyihani amalga oshirish uchun moliyaviy holati va qo‘shma loyihani amalga oshirish uchun o‘z moliyaviy mablag‘lariga egaligi;
o‘rnatilgan tartibda investitsion loyihaning to‘ldirilgan shakli;
loyihani amalga oshirish uchun mahalliy tadbirkorlik sub’ekti tomonidan taklif etiladigan ishlab chiqarish bino va inshootlari hamda unda tegishli muhandislik-kommunikatsiya (elektr, gaz tarmog‘i, suv) infratuzilmalarining mavjudligi.       
Yuqoridagilarni inobatga olgan holda, «Dazzini Machine», «Bennetti Machine» va «Pedrini» kompaniyalari bilan hamkorlik qilish istagida bo‘lgan mahalliy tadbirkorlik sub’ektlari o‘z takliflarini joriy yilning 23 dekabriga qadar Palataning Zamonaviy texnologiyalar va xorijiy investitsiyalarni jalb etish bo‘limiga (g.usmanov@chamber.uz) elektron ko‘rinishda taqdim etishlarini so‘raymiz.

Shu bilan birga, mahalliy tadbirkorlar mazkur masala bo‘yicha qo‘shimcha ma’lumot uchun Palataning Zamonaviy mini-texnologiyalar va xorijiy investitsiyalarni jalb etish bo‘limi mas’ul xodimi Usmonov G‘afurjonga (+99871) 150-91-69 telefon raqamiga murojaat qilishlari mumkin.