Jizzax viloyatida “Tashabbus-2018” ko'rik tanlovining viloyat bosqichi bo'lib o'tdi

Joriy yilning 10 oktyabr kuni O'zbekiston Respublikasi Prezidenti sovrini uchun tadbirkorlar, fermerlar va hunarmandlar o'rtasida an'anaviy tarzda har yili o'tkazilib kelinayotgan “Tashabbus-2018” ko'rik tanlovining Jizzax viloyati bosqichi “YU.Rajabiy” nomli viloyat musiqali drama teatri binosida bo'lib o'tdi.
Ko'rik-tanlovda ishtirok etgan tadbirkor, fermer va hunarmandlar 5 ta asosiy yo'nalishlar bo'yicha baholandi.

Tadbirni O'zbekiston Savdo-sanoat palatasi raisi o'rinbosari J.Urakov ochib berdi. O'z nutqida “Tashabbus-2018” ko'rik-tanlovining yurtimizda faoliyat yuritayotgan kichik biznes va xususiy tadbirkorlik sub'ektlarini qo'llab-quvvatlash hamda ularning faoliyatini yanada kengaytirishda alohida ahamiyatga egaligini aytdi. Shuningdek, “Tashabbus 2018” ko'rik tanlovi bu yil o'tgan yildagi tanlovlarga nisbatan  yangicha formatda o'tkazilayotgani, nominatsiyalar yana 2 taga ortganini ta'kidladi.
Ko'rik-tanlov doirasida 42 nafar ishtirokchi tomonidan to'qimachilik va tikuvchilik, qurilish sanoati, xomashyoni qayta ishlash, qishloq xo'jaligi, mahalliylashtirish dasturiga kirgan mahsulotlar, milliy hunarmandlik buyumlari namoyish etildi.

Bundan tashqari, tadbirkorlik faoliyatiga xizmat ko'rsatuvchi, jumladan, sug'urta kompaniyalari va tijorat banklari ham o'z stendlari bilan ishtirok etishdi hamda xizmat turlari haqida tashrif buyurganlarga ma'lumot berishdi.
Ko'rik-tanlov yakunlariga ko'ra, yakka tartibdagi tadbirkor Narzullaeva Barno “Yilning eng yaxshi xunarmandi”, “MIRZA MAXMUD” fermer xo'jaligi - “Yilning eng yaxshi fermeri” deb topildi.

“MEGA INVEST INDUSTRIAL” ma'suliyati cheklangan jamiyati sanoat sohasidagi “Yilning eng yaxshi tadbirkori” nominatsiyasida g'oliblikni qo'lga kiritgan bo'lsa, “AZIM ZOMIN SHIFO” ma'suliyati cheklangan jamiyati xizmat ko'rsatish sohasidagi “Yilning eng yaxshi tadbirkori” deb e'tirof etildi. 

Yoshlar tadbirkorligiga davlatimiz tomonidan berilayotgan e'tibor hisobga olinib, “Tashabbus-2018” ko'rik-tanlovi nominatsiyalari qatoriga yangi “Yilning eng yaxshi yosh tadbirkori” nominatsiyasi kiritilgan edi. Mazkur nominatsiyada “LUXURY FURNITURE BUSSINESS” ma'suliyati cheklangan jamiyati ko'rik-tanlovning Jizzax viloyat bosqichida g'oliblikni qo'lga kiritdi.

G'olib va sovrindorlarga tashkilotchilar tomonidan diplom va esdalik sovg'alari taqdim etildi. Viloyat bosqichida birinchilikni qo'lga kiritgan g'oliblarga respublika bosqichiga yo'llama berildi. 

O'z SSP Axborot hizmati  t.me/uzchamber