“Hunarmand” uyushmasi matbuot anjumani

2019 yil 6 dekabr kuni O‘zbekiston Respublikasi Prezidenti Administratsiyasi huzuridagi Axborot va ommaviy kommunikasiyalar agentligi majlislar zalida O‘zbekiston Respublikasi “Hunarmand” uyushmasi tomonidan O‘zbekiston Respublikasi Prezidentining 2019 yil 28 noyabrdagi “Hunarmandchilikni yanada rivojlantirish va hunarmandlarni qo‘llab-quvvatlash bo‘yicha qo‘shimcha chora-tadbirlar to‘g‘risida”gi PQ-4539-sonli qarorida belgilangan chora-tadbirlar yuzasidan Matbuot anjumani o‘tkazildi.

Matbuot anjumanida O‘zbekiston Respublikasi Savdo-sanoat palatasi raisi A.Ikramov, "Hunarmand" uyushmasi raisi U. Abdullaev., shuningdek, “Xalq banki”, O‘zbekiston Respublikasi Turizmni rivojlantirish Davlat qo‘mitasi, O‘zbekiston Elektron ommaviy axborot vositalari miliy assosiasiyasi, O‘zbekiston milliy teleradiokompaniyasi mas'ul xodimlari, hunarmandlar va ommaviy axborot vositalari xodimlari ishtirok etdilar.

Anjumanni O‘zbekiston Savdo-sanoat palatasi raisi A.I.Ikramov kirish so‘zi bilan ochib berdi.

O‘z nutqida Adxam Ikramov “Hunarmandchilikni yanada rivojlantirish, hunarmandlarni har tomonlama qo‘llab-quvvatlash chora-tadbirlari to‘g‘risida” PF-5242 sonli Farmoni qabul qilinganidan so‘ng erishilgan natijalarga to‘xtalib o‘tdilar. Xususan, “Hunarmand” uyushmasi a'zolariga 42 turdagi  turli xil imtiyozlar berilganligi, uyushma a'zolari soni 2.5 barobarga oshgani va  bugungi kunda ular soni 32 ming nafarga yetganligi xamda  53.5 ming nafar shogirdlar tayyorlanishiga erishilganligi xaqida ta'kidlab o‘tdilar.

Shuningdek, “2018-2019 yillarda O‘zbekiston Respublikasida hunarmandchilikni rivojlantirish hisobiga amalga oshiriladigan loyihalarning yig‘ma dasturi” tasdiqlanib, dasturga muvofiq respublikada 405.1 mlrd. so‘mlik 12 402 ta hunarmandchilik loyihalariga tijorat banklari tomonidan imtiyozli kreditlar ajratildi va 46.4 mingta yangi ish o‘rinlari yaratildi”. 2018-2019 yillarda jami 18 mln. AQSh dollari miqdorida hunarmandchilik mahsulotlari eksporti amalga oshirildi.

Matbuot anjumanida "Hunarmand" uyushmasi raisi Ulug‘bek Abdullaev Davlatimiz rahbarining “Hunarmandchilikni yanada rivojlantirish va hunarmandlarni qo‘llab-quvvatlash bo‘yicha qo‘shimcha chora-tadbirlar to‘g‘risida”gi PQ-4539-sonli qarorining mazmun va moxiyati bilan ishtirokchilarni tanishtirib o‘tdi.

Qarorga ko'ra:

• Xalq amaliy san'ati ustalarining  Milliy katalogi tashkil etiladi va 2020 yil 1 yanvardan boshlab Milliy katalog ochiq va umum foydalaniladigan veb-sayt ko‘rinishida ishga tushiriladi.
• Xalq amaliy san'ati ustalarining milliy katalogiga kiritiladigan nomzodlarni tanlash bo‘yicha “Hunarmand” uyushmasi raisi rahbarligida O‘zbekiston Respublikasi Madaniyat vazirligi, Badiiy akademiyasi rahbarlari va mas'ul xodimlaridan iborat bo‘lgan Kengash tuziladi.Milliy katalogga kiritilgan hunarmandlarga shogirdlar soni bo‘yicha cheklovlar ham bekor qilinadi.
• O‘zbekiston Respublikasi Turizmni rivojlantirish davlat qo‘mitasi “Hunarmand” uyushmasi bilan birgalikda turizm sohasida faoliyat yuritayotgan hunarmandlar reestrini joriy etishi belgilandi.
• “Hunarmand” uyushmasi a'zolariga ishlab chiqarish ehtiyojlari uchun asbob-uskuna, ehtiyot qismlar va xomashyo materiallarini xarid qilish, hunarmandchilikni rivojlantirish markazlari, “usta-shogird” maktablarini tashkil etish, uy-muzey va ustaxonalar qurish yoki shu maqsadlarda bino va inshootlar sotib olish, aylanma mablag‘larini to‘ldirish uchun O‘zbekiston Respublikasi Markaziy bankining qayta moliyalash stavkasidan oshmagan holda 18 oy muddatga, bazaviy hisoblash miqdorining 250 baravaridan oshmagan miqdorda kreditlar ajratishi belgilanganligini aytib o‘tdi.
• 2020/2021 o‘quv yilidan boshlab hunarmandchilikka ixtisoslashgan hududlarda hunarmandchilik va xalq amaliy san'ati yo‘nalishlari bo‘yicha bolalar musiqa va san'at maktablari, “Barkamol avlod” bolalar markazlari hamda Bandlik va mehnat munosabatlari vazirligi tizimidagi kasb-hunarga o‘qitish markazlarida o‘quv kurslari tashkil etiladi.
• Ikki oy muddatda yirik savdo majmualari va dehqon bozorlari hududlarida alohida “hunarmandlar rastalari”ni tashkil etilishi belgilandi. “Hunarmand” uyushmasiga a'zo bo‘lgan hunarmandlar doimiy ravishda “hunarmandlar rastalari”ga joylashtirib boriladi. Shu bilan birga Qoraqalpog‘iston Respublikasi, viloyatlar va Toshkent shahrining tuman va shaharlarida milliy hunarmandchilikning barcha yo‘nalishlarini o‘zida mujassam etadigan zamonaviy “hunarmandlar bozori” tashkil etiladi.
• Xunarmandlarni ijtimoiy qo‘llab-quvvatlash maqsadida “Suzuk ota” majmuasi misolida ixtisoslashtirilgan hunarmandchilik majmualarini tashkil etish choralarini ko‘rish belgilangan.
• O‘zbekiston Badiiy akademiyasi, O‘zbekiston Respublikasi Madaniyat vazirligi, Davlat aktivlarini boshqarish agentligi va “Hunarmand” uyushmasi bilan birgalikda Qoraqalpog‘iston Respublikasi va viloyatlar markazlarida hamda Toshkent shahrida xalq amaliy san'ati va hunarmandchilik mahsulotlari ko‘rgazma zallari va galereyalarini tashkil etishi belgilangan.
• Respublikada hunarmandchilik sohasining rivojlanishini baholash uchun tegishli indikatorlarni Davlat statistika qo‘mitasi, Savdo-sanoat palatasi va “Hunarmand” uyushmasi bilan birgalikda  ishlab chiqadi va ularning 2020 yildan boshlab har chorakda ommaviy axborot vositalarida chop etib boriladi.
• Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari  mazkur qarorda belgilangan chora-tadbirlar hamda tuman va shaharlarning hunarmandchilik yo‘nalishlari bo‘yicha ixtisoslashuvidan kelib chiqqan holda Qoraqalpog‘iston Respublikasi, viloyatlar va Toshkent shahrida 2020-2021 yillarda hunarmandchilikni rivojlantirish strategiyalarini ishlab chiqadi va ishlab chiqilgan strategiyalar bo‘yicha O‘zbekiston Respublikasi Vazirlar Mahkamasida taqdimot o‘tkazadi hamda tegishli tartibda tasdiqlanadi.
• O‘zbekiston Milliy teleradiokompaniyasi “Hunarmand” uyushmasi bilan birgalikda ommaviy axborot vositalarida hunarmandchilik va xalq amaliy san'ati tarixi hamda bugungi rivojini keng targ‘ib qilib borish maqsadida “Madaniyat va ma'rifat” telekanalida muntazam namoyish etiladigan hunarmandchilikka oid teleko‘rsatuvlarni tashkil etiladi.

Matbuot anjumani so‘ngida jurnalistlar o‘zlarini qiziqtirgan savollarini berdilar va koniqarli javoblar olishga muvoffaq bo‘ldilar.

SSP Axborot xizmati