Jamoatchilik ekspertizasi o'tkazilgan normativ-huquqiy hujjat loyihasi xususida

“O'zbekiston Respublikasi Savdo-sanoat palatasi to'g'risida”gi Qonunning 22-moddasida belgilangan Savdo-sanoat palatasining qonun ijodkorligi sohasidagi vakolatlarini amalga oshirgan holda, Palata tomonidan qonunchilik hujjatlari loyihalari yuzasidan Jamoatchilik ekspertizalari o'tkazilib, ularning tadbirkorlik faoliyatiga ta'sirini baholagan holda, salbiy hamda ijobiy xarakterdagi Xulosalar berib kelinmoqda.

Xususan, joriy yilning o'tgan davri mobaynida 64 ta normativ-huquqiy hujjat loyihasi Palata tomonidan ko'rib chiqilib, Jamoatchilik ekspertizasi xulosalari berildi.

Misol uchun, “O'zbekipaksanoat” uyushmasi tomonidan ishlab chiqilgan O'zbekiston Respublikasi Vazirlar Mahkamasining “Pillachilik va tutchilik tashkilotlariga tutzorlarda suv tejovchi sug'orish texnologiyalarini joriy etish bo'yicha xarajatlarining bir qismini qoplab berish chora-tadbirlari to'g'risida”gi Qarori loyihasi  jamoatchilik ekspertizasidan  o'tkazilib, u yuzasidan quyidagicha Jamoatchilik ekspertizasi xulosasi berildi:

1. Loyiha ilovasining 1-bandiga ko'ra, “Ushbu Nizom qishloq xo'jaligi ishlab chiqaruvchilariga yangi intensiv tut plantatsiyalarida tomchilatib sug'orish texnologiyasini joriy etish xarajatlarining bir qismini, shuningdek, ularni xarid qilish va qurishga ajratiladigan bank kreditlari bo'yicha foiz xarajatlarining bir qismini qoplash tartibini belgilaydi”.

Bunda, faqat yangi intensiv tut plantatsiyalarida tomchilatib sug'orish texnologiyasini joriy etish xarajatlarining bir qismini qoplash nazarda tutilgan.

Ammo, O'zbekiston Respublikasi Prezidentining 2020 yil 17 yanvardagi “Pillachilik tarmog'ida ipak qurti ozuqa bazasini rivojlantirish bo'yicha qo'shimcha chora-tadbirlar to'g'risida”gi PQ-4567-sonli Qarori 2-bandida “Shunday tartib o'rnatilsinki, unga muvofiq yangi intensiv tutzorlar barpo etishni davlat tomonidan qo'llab-quvvatlash maqsadida 2020 yil
1 fevraldan boshlab O'zbekiston Respublikasining Davlat byudjeti mablag'lari hisobidan:

pillachilik va tutchilik tashkilotlariga tutzorlarda tomchilatib sug'orish tizimini joriy etish xarajatlarining bir qismini qoplash uchun tomchilatib sug'orish tizimini joriy etgan holda yangidan tashkil etilgan tutzorlarning har bir gektariga 8 million so'mgacha;

maydoni 35 gektardan ziyod tutzorlarda suv chiqarish uchun burg'ulangan quduqni, shuningdek, daryolar, kanallar va boshqa suv havzalaridan suvni tortish uchun nasos stansiyasini qurishga 120 million so'mgacha subsidiya taqdim etiladi”.

Ya'ni, bunda, nafaqat yangi intensiv tut plantatsiyalarida tomchilatib sug'orish texnologiyasini joriy etishga balki, tutzorlarda suv chiqarish uchun burg'ulangan quduqni, shuningdek, daryolar, kanallar va boshqa suv havzalaridan suvni tortish uchun nasos stansiyasini qurishga ham subsidiya ajratilishi belgilangan.

2. Loyiha ilovasida talabgorlarga subsidiya ajratishning o'ta murakkab, bosqichma-bosqich bo'lgan tartibi belgilangan.

Ya'ni, subsidiya olish uchun talabgorning murojaati 3 bosqichli komissiya (tuman ishchi komissiyasi, hududiy ishchi komissiya, “O'zbekipaksanoat” uyushmasi) tomonidan ikki bosqichda (dastlab ariza bilan murojaat qilingan vaqtda hamda ob'ektlar qurilishi tugatilgandan so'ng) qayta-qayta ko'rib chiqilishi, arizalarni o'rganish natijasi bo'yicha esa, ularni manzilli ro'yxatga kiritilishi, komissiyalar tomonidan joyiga chiqilgan holda o'rganilishi nazarda tutilgan.

Bu esa, ushbu sohada subsidiya ajratilishini murakkablashtirib, talabgorlarni qiyin huquqiy holatga solib qo'yadi, shuningdek sohada korrupsiya holatlarining yuzaga kelishiga zamin yaratadi.

3. Ushbulardan kelib chiqib, shuningdek yuqoridagi Qaror ijrosini aniq ta'minlash maqsadida, mazkur loyihani qayta ko'rib chiqish, unda subsidiyaning Qarorda belgilangan maqsadlar uchun ajratilishini aniq belgilash hamda uni ajratishda soddalashtirilgan tartibni nazarda tutish maqsadga muvofiq.

Bu boradagi faoliyat davom etmoqda.