Tadbirkorning qonuniy manfaatlari himoya qilindi

O‘zbekiston Savdo-sanoat palatasi Toshkent shahar hududiy boshqarmasiga uning a'zosi “Kafolat sug‘urta kompaniyasi” AJ murojaat qilib, Termiz shahar hokimligidan kompensatsiya pulini undirishda amaliy yordam so‘ragan.

“Kafolat sug‘urta kompaniyasi” AJning Surxondaryo viloyat filialiga tegishli bino davlat va jamoat ehtiyojlari uchun zarurat tug‘ilganligi bois buzib tashlangan va tadbirkorga 267 mln.so‘m miqdorida moddiy zarar yetkazilgan.

Yetkazilgan zarar hokimlik tomonidan ixtiyoriy ravishda to‘lab berilmaganligi sababli, Savdo-sanoat palatasi tomonidan “Kafolat sug‘urta kompaniyasi” AJ manfaatida Termiz shahar hokimligidan yetkazilgan zarar undirish to‘g‘risida sudga da'vo ariza bilan murojaat qilingan.

Surxondaryo viloyat iqtisodiy sudining 2020 yil 18 maydagi hal qiluv qarori bilan SSPning da'vo arizasi qanoatlantirilib, “Kafolat sug‘urta kompaniyasi” AJ foydasiga Termiz shahar hokimligi hisobidan 267 mln. so‘m miqdorida kompensasiya puli undirib berildi va Palata a'zosining huquq va qonuniy manfaatlari himoya qilindi

SSP Axborot-xizmati