Kattaqo‘rg‘on shahrida “Muvaffaqiyatga erishish sirlari” loyihasi bo‘yicha uchrashuvlar tashkil qilindi.

Jamiyatda ayollar va yoshlarning rolini oshirish hamda bandligini ta'minlash maqsadida, hududlarda muvaffaqiyatga erishgan tadbirkorlik subyektlari va yoshlarning uchrashuvlarini tashkil qilish bo‘yicha tasdiqlangan grafikka asosan navbatdagi uchrashuv Samarqand viloyatining Kattaqo‘rg‘on shahrida o‘tkazildi.

Shaharda yoshlar daftariga kiritilgan, tadbirkorlik yoki hunarmandchilik faoliyatini boshlashga o‘zida qiziqishi bo‘lgan 50 nafardan ortiq yoshlar va tadbirkorlik sub'ektlari o‘rtasidagi uchrashuv joriy yilning 13 noyabr' kuni Kattaqo‘rg‘on shahridagi 2-sonli musiqa maktabining majlislar zalida tashkil qilindi.

Savdo-sanoat palatasi Yoshlar ishlari agentligi, “Hunarmand” uyushmasi hamda Oliy va o‘rta maxsus ta'lim vazirligi tomonidan tashkil qilingan tadbirda yoshlar o‘zlarining qiziqishlari bo‘yicha guruhlarga ajratildi va ularga o‘z sohasida muvaqqiyatga erishgan tadbirkorlar va hunarmandlar tomonidan master-klasslar o‘tkazildi.

Uchrashuvlar yakunida yoshlarning ro‘yxati shakllantirilib, O‘zbekiston Respublikasi Prezidentining 2020 yil 13 oktyabrdagi PQ-4862-sonli qarorida ko‘zda tutilgan nodavlat ta'lim muassasalarida ular uchun o‘quvlarni tashkil qilish, imtiyozli kredit mablag‘lari ajratilishiga ko‘maklashish hamda o‘zining tadbirkorlik faoliyatini boshlashiga ko‘maklashish belgilab olindi.

SSP Axborot-xizmati