Savdo-sanoat palatasi raisi ishtirokida Xalq deputatlari Ellikqal'a tumani Kengashining navbatdan tashqari yig‘ilishi bo‘lib o‘tdi

2020 yil 10 dekabr' kuni Xalq deputatlari Ellikqal'a tumani Kengashining navbatdan tashqari yig‘ilishi bo‘lib o‘tdi.

Ma'lumki, O‘zbekiston Respublikasi Prezidentining joriy yil 2-oktyabrdagi Qoraqalpog‘iston Respublikasiga tashrifi davomida respublikaning har bir tuman va shaharini 2020-2023 yillarda kompleks ijtimoiy-iqtisodiy rivojlantirish bo‘yicha dastur tayyorlash topshirig‘i berilgan edi.

Shundan kelib chiqib, Qoraqalpog‘iston Respublikasining barcha tuman va shaharlarida respublika “Ishchi guruh”lari tomonidan mahallabay o‘rganishlar o‘tkazilib, ijtimoiy-iqtisodiy rivojlantirish bo‘yicha tegishli dasturlar loyihalari tayyorlangan.

Jumladan, O‘zbekiston Savdo-sanoat palatasi raisi Adxam Ikramov boshchiligidagi “Ishchi guruhi” tomonidan ham “Ellikqal'a tumanini 2020-2023 yillarda kompleks ijtimoiy-iqtisodiy rivojlantirish bo‘yicha” dastur loyihasi tayyorlanib, Xalq deputatlari Ellikqal'a tumani Kengashining navbatdan tashqari 12-sessiyasida ko‘rib chiqilgan edi.

O‘z navbatida har bir tuman va shahar bo‘yicha ishlab chiqilgan dasturlar O‘zbekiston Respublikasi Prezidentining 2020-yil 11-noyabrdagi “2020-2023 yillarda Qoraqalpog‘iston Respublikasini kompleks ijtimoiy-iqtisodiy rivojlantirish chora-tadbirlari to‘g‘risida”gi PQ-4889-son qarorida o‘z aksini topdi.

Shundan kelib chiqib, joriy yilning 10 dekabr kuni Xalq deputatlari Ellikqal'a tumani Kengashining navbatdan tashqari yig‘ilishi tashkil etilib, O‘zbekiston Respublikasi Prezidentining mazkur Qaroriga muvofiq, Ellikqal'a tumanini ijtimoiy-iqtisodiy rivojlantirish bo‘yicha belgilangan chora-tadbirlar ijrosi yuzasidan deputatlik va jamoatchilik nazoratini tashkil etish masalalari belgilab olindi.

Endilikda har bir mahalla bo‘yicha amalga oshiriladigan ijtimoiy-iqtisodiy chora-tadbirlar ijrosi yuzasidan deputatlik va jamoatchilik nazorati olib boriladi.

Maqsad, tuman aholisining ijtimoiy-iqtisodiy farovonligini oshirish bo‘yicha belgilangan chora-tadbirlarni manzilli amalga oshirish, muammolarni o‘z vaqtidla aniqlab, hal etish va natijadorlikni ta'minlashdan iborat.

SSP Axborot-xizmati