"O‘zbekiston-Saudiya Arabistoni" biznes-forumi tashkil etildi

2020-yilning 15-dekabr kuni Savdo-sanoat palatasi binosida “O‘zbekiston-Saudiya Arabistoni qishloq xo‘jaligi sohasidagi biznes forumi” tashkil etildi.

So‘nggi yillarda O‘zbekiston Respublikasining Saudiya Arabistoni bilan munosabatlari sezilarli darajada faollashdi.

 O‘zbekiston va Saudiya Arabistoni siyosiy, savdo-iqtisodiy, investitsiyaviy, ilmiy-texnikaviy va  ijtimoiy-madaniy sohalarda hamkorlik aloqalarini rivojlantirishdan manfaatdorlar.

O‘zbekiston va Saudiya Arabistoni o‘rtasidagi diplomatik munosabatlar 1992 yil fevral oyida o‘rnatilgan.

Ma'lumki, so‘nggi 2-3 yil ichida Saudiya Arabistoni va O‘zbekiston o‘rtasida ayniqsa, savdo-iqtisodiy, investisiyaviy, madaniy va diniy hamkorlik aloqalari har tomonlama rivojlanib bormoqda.

Hozirgi kunda jahon miqyosida keng tarqalgan va mamlakatlar iqtisodiyotiga salbiy ta'sir etayotgan koronavirus pandemiyasiga qaramasdan ikki davlat o‘zaro hamorlik munosabatlarini kengaytirishga tayyordirlar.

Ikki davlat savdo aylanmasining hajmi joriy yilning 9 oyida 23,5 mln. AQSh doll.ga teng bo‘lib, bunda eksport hajmi – 0,4 mln. AQSh.doll. va import hajmi – 23,1 mln. AQSh doll.ni tashkil etgan.

Bugungi kunda Saudiya Arabistoni va O‘zbekiston ikki tomonlama tovarlar savdo aylanmasini jadal rivojlantirish uchun barcha imkoniyatlarga egadirlar.

Hozirgi kunda O‘zbekistonda Saudiya Arabistoni investorlari ishtirokida 14 ta korxona faoliyat ko‘rsatmoqda va ularning 4 tasi 100 % Saudiya kapitali asosida faoliyat yuritadi.

So‘nggi yillarda Saudiya Arabistoni va O‘zbekiston Savdo-sanoat palatalarining sa'y-harakatlari bilan qator biznes delegasiyalarning tashriflari amalga oshirildi. Ikki davlat o‘rtasidagi hamkorlik aloqalarining mustahkamlanishida ishbilarmon doiralarining ham hissasi katta bo‘lmoqda.

Ushbu biznes-forumda O‘zbekiston Savdo-sanoat palatasi raisi Adxam Ikramov, Riyoz Savdo palatasi raisi o‘rinbosari Naif Al' Radji, shuningdek, Namangan va Xorazm viloyati investitsiya va tashqi savdo bo‘yicha hokim o‘rinbosarlari, ikki davlatning ma'sul vazirlik va idora vakillari, hamda qishloq xo‘jaligi yo‘nalishida O‘zbekiston tomonidan 30 dan ortiq, Saudiya Arabiston tomonidan 20 ga yaqin tadbirkorlik sub'ektlari ishtirok etishdi.

O‘zbekiston Saudiya Arabistoni bozoriga oziq-ovqat, yangi uzilgan va qayta ishlangan meva-sabzavot mahsulotlarini yetkazib berishga tayyordir.

Shu munosabat bilan tadbir davomida O‘zbekiston Savdo-sanoat palatasi raisi A.Ikramov tomonidan Riyoz Savdo palatasiga savdo-aloqalarining davomiyligi sifatida, 2021-yil fevral oyida ikki davlat tadbirkorlari ishtirokida onlayn biznes muloqotni tashkil etish, savdo-iqtisodiy sohani tartibga solish maqsadida 2021-yil davomida ikki davlat vakolatli idoralar xususan, standardizatsiya, karantin va bojxona kabi idoralar o‘rtasida onlay uchrashuvlarni tashkil etish va fikr almashish hamda transport va investitsiya yo‘nalishida hamkorlik qilish kabi o‘zaro hamkorlik masalalari bo‘yicha kelishuvga erishilishi ko‘zda tutilmoqda.

SSP Axborot-xizmati