SSP tomonidan Xiva shahrida ichki turizmni rivojlantirishga qaratilgan chora-tadbirlarni muhokama etishga bag‘ishlangan videomuloqot o‘tkazildi

2020 yil 17-dekabr kuni Xorazm viloyati, Farg‘ona, Andijon va Namangan viloyatlari hokimliklari, Turizmni rivojlantirish qo‘mitasi, Savdo-sanoat palatasi va mahalliy tadbirkorlar ishtirokida Xiva shahrida ichki turizmni rivojlantirishga qaratilgan chora-tadbirlarni muhokama etishga bag‘ilshangan videokonferensaloqa shaklida ochiq muloqot bo‘lib o‘tdi.

Ushbu videomuloqot O‘zbekiston Respublikasi Prezidenti Sh.Mirziyoyevning joriy yil 12-13 dekabr kunlari Xorazm viloyatiga tashriflari doirasida ichki turizmni rivojlantirish, xususan  Xorazm viloyatida mehmonxona o‘rinlarini ko‘paytirish, turistlar sonini yanada oshirish, salohiyatli mamlakatlardan Urganchga doimiy va charter reyslar tashkil etish bo‘yicha topshiriqlari ijrosini o‘z vaqtida ta'minlashga qaratildi.

Ushbu tadbirni O‘zbekiston Savdo-sanoat palatasi raisi A.Ikramov kirish so‘zi bilan ochib, dunyoda keng tarqalgan koronavirus pandemiyasi turizm sohasiga jiddiy ta'sir ko‘rsatayotganligi, oqibatda 2020 yilda turistlar oqimi keskin kamayganligi, Xorazm viloyatining turizm sohasini qayta tiklash, avvalo, ichki turizmni jonlantirish, mahalliy turistlar oqimini shakllantirish hamda buning uchun turistik ob'ektlar, turistik marshrutlarni tuzish masalalariga  atroflicha to‘xtalib o‘tildi.

Muhokama davomida turoperatorlar, mehmonxona faoliyatini yurituvchi tadbirkorlik subyektlari tomonidan Xiva shahrida ichki turizmni rivojlantirishga qaratilgan qator takliflar ilgari surildi.

Jumladan, Farg‘ona viloyatida faoliyat ko‘rsatuvchi “Fargona Vodiy Sayyoh” MChJ rahbari X.Abduraximov tomonidan quyidagi takliflar bildirildi:

-pandemiya davrida ichki turizmni rivojlantirish uchun tijorat banklari tomonidan aholiga 2 mln.so‘mgacha miqdorda sayohat kreditlarini ajratishni yo‘lga qo‘yish. Bunda sayohat kreditlarini ajratish fuqarolarning boshqa yo‘nalishlar bo‘yicha kreditlaridan qarzdorligidan qa'tiy nazar berilishini nazarda tutish;

-pandemiya davrida ichki turizmni rivojlantirish uchun Xiva shahridagi turistik obyektlarga kirish chiptasi, mini tur va to‘liq tur chiptalari uchun 25% chegirmalarni joriy etish;

-viloyatlardagi kasaba uyushmalari boshqarmalari tomonidan iqtisodiyotning turli tarmoqlari mehnat jamoalari uchun ichki turizm bo‘yicha turpaketlarni xarid qilishda 25% gacha to‘lov miqdorini qoplab berishni ko‘zda tutish.

Namangan viloyatidagi turoperatorlar tomonidan Xiva shahriga sayohat qilish uchun turpaketlar mahalliy turistlarga imtiyozli narxlarda berilishi va bunda transport harajatlaridan chegirimlarni mavsumga qarab joriy etilishi taklif qilindi.

O‘zbekiston otelyerlar uyushmasi raisi F.Abdullaeva tomonidan Xiva shahridagi mehmonxonalar uchun mehmonxona bekalari, oshpazlar, ofisiantlarni malakasini oshirish va bunda qisqa muddatli o‘quv kurslarini yuqori standartlar asosida tashkil etish takliflari bildirildi.

Tadbirda Xiva shahridagi “Arqonchi Xotel” mehmonxonasi rahbari R.Ruzmetov tomonidan transport vositalari xaydovchilarini  Xiva shahrini tarixi to‘g‘risida bilimlarini oshirish va turistlarga Xiva shahrida bo‘lishlarida qiziqarli tarixiy ma'lumotlarni yetkazib borishlari kerakligini taklif qildi.

"XIVA AVTO TUR"  MChJ  rahbari D.Yakubov tomonidan mahalliy turstlar uchun xizmat ko‘rsatuvchi mikroavtobus va avtobuslarga tuzatish-ta'mirlash xizmatini ko‘rsatuvchi avtoservis shahobchalarini joriy etish va transport vositalarini joriy ta'mirlash xizmatlarini tashkil etilishi transport sohasida tashuvlarni xavfsiz va yuqori sifat bilan amalga oshirish imkonini berishini ma'lum qildi.

Xiva shahridagi “Umar” mehmonxonasi rahbari X.Malikov tomonidan Xiva shahrida respublika miqyosidagi sport musobaqalari va turli kasb vakillarining anjumanlarini muntazam ravishda o‘tkazish orqali ichki turizmni rivojlantirishga xizmat qilishini bildirdi.

Muhokamada Xiva shahrida xunarmandlar festivali, sport musobaqalari, yoshlar va oliy o‘quv yurtlarining anjumanlari, turli kasblar se'zdlarini tashkil etish masalasida mutasaddi vazirlik va idoralarni jalb etish taklifi bildirildi.

Muhokama yakunida Farg‘ona, Andijon, Namangan viloyatlari hokimliklari mahalliy turoperatorlari bilan Xiva shahriga ichki turizmni yo‘lga qo‘yish bo‘yicha takliflarni tayyorlab kiritishlari kelishib olindi.

Xiva shahar hokimligi tomonidan Savdo-sanoat palatasi bilan hamkorlikda Xiva shahrida ichki turizmni rivojlantirish bo‘yicha aholining barcha qatlamlarini e'tiborga olgan holda qariyalar, xotin-qizlar, yoshlar, talaba va o‘quvchilar, byudjet tashkilotlari, mehnat jamoalari va sportchilar uchun turli tarifdagi turpaketlarni ishlab chiqishga kelishib olindi.

SSP Matbuot xizmati