Savdo-sanoat palatasining yuridik xizmati xodimlari ishtirokida davra suhbati bo‘lib o‘tdi

Joriy yilning 18 dekabr' kuni Palataning yuridik xizmati xodimlari ishtirokida tadbirkorlik sub'ektlarining huquq va qonuniy manfaatlarini himoya qilishning dolzarb masalalariga bag‘ishlangan videokonferensaloqa shaklida davra suhbati bo‘lib o‘tdi.

Tadbirda Palataning eng muhim vazifalaridan biri Palataga a'zo bo‘lgan tadbirkorlik sub'ektlarining huquq va qonuniy manfaatlarini sud orqali himoya qilish, ularga sifati va ishonchli yuridik xizmat ko‘rsatish ekanligi ta'kidlandi.

Tadbir davomida Palata va uning hududiy boshqarmalarining yuridik xizmatlari tomonidan sudlarga da'vo arizalari kiritishda vujudga kelayotgan muammolar va ularni bartaraf etish yuzasidan taklif va mulohazalar muxokama etildi.

Jumladan, Palata a'zolari manfaatida sudlarga arizalar, da'vo va shikoyatlar kiritishda “Tadbirkorlik sub'ektlarning huquq va qonuniy manfaatlarini sudlarda himoya qilishni ta'minlash to‘g‘risida”gi Yo‘riqnoma talablariga qat'iyan rioya etish lozimligi ta'kidlab o‘tildi.

Bundan tashqari, tadbir davomida O‘zbekiston Respublikasi Prezidentining 24.11.2020 yildagi PF-6118-sonli “Sud hujjatlari va boshqa organlar hujjatlarini ijro etish tizimini yanada takomillashtirish chora-tadbirlari to‘g‘risida”gi Farmoni mazmun va mohiyatini mutasaddi tashkilotlar bilan hamkorlikda tadbirkorlik sub'ektlari o‘rtasida keng targ‘ibot qilish hamda ushbu Farmon bilan Palataga berilgan vakolatdan samarali foydalanish tizimini yo‘lga qo‘yish masalasiga ham e'tibor qaratildi.

 SSP Axborot-xizmati