Qishloq xo'jaligi ishlab chiqaruvchilari uchun konsalting xizmatlari sifatini oshiramiz

So'nggi yillarda mamlakatimizda qishloq xo'jaligini rivojlantirishga katta e'tibor qaratilmoqda. Qishloq xo'jaligi ishlab chiqaruvchilari barcha sohalarda, shu jumladan ma`lumot taqdim qilish borasida ham faol qo'llab-quvvatlanmoqdalar.

Axborot va maslahat xizmatlari qishloq xo‘jaligi mahsulotlarini ishlab chiqarish zanjirining zarur bo‘g‘ini bo‘lib, uning yordamida hosilni yetishtirish, saqlash, yetkazib berish va sotish bilan bog‘liq ko‘plab muammolar aniqlanadi va hal etiladi.

Buning chuqur mohiyatini anglagan holda joriy yilning 26-yanvar kuni Farg‘ona shahrida O‘zbekiston Savdo-sanoat palatasi va BMT Taraqqiyot dasturining hamkorlikdagi hamda Rossiya Fedaratsiyasini moliyaviy ko‘magida amalga oshirilayotgan «Farg‘ona vodiysida fermerlarni iqlim o‘zgarishi xatarlariga moslashishi va barqarorligini oshirish» loyihasi doirasida saralab olingan viloyat va tuman karantin inspeksiyalari vakillari uchun "Qishloq xo‘jaligida konsalting xizmatlari" mavzusida seminar tashkil etildi.

Ushbu seminarning asosiy maqsadi ishtirokchilarni qishloq xo‘jaligida konsalting xizmatlari asoslari va ularning rivojlanish bosqichlari, xalqaro tajribalar bilan batafsilroq tanishtirish va viloyat o‘simliklar karantini inspeksiyalari qoshida tashkil etilgan "Fitokonsulting markazlari"ning faoliyati doirasida taqdim etilayotgan konsalting xizmatlarini rivojlantirish yuzasidan muhokamalar olib borish edi.

Seminar mobaynida qishloq xo‘jaligi axborot-maslahat xizmatlarining vazifalari nimalardan iborat, ushbu xizmatlarning xodimlariga qanday talablar qo‘yiladi, xizmatlar va taqdim etilayotgan ma’lumotlarning sifatini oshirish uchun nima qilish kerak, guruh telegramlari orqali yuqori sifatli ma’lumotlarni taqdim etishda nimalarga e’tibor qaratish kerak shu va boshqa ko‘plab dolzarb masalalar ishtirokchilar tomonidan batafsil ko‘rib chiqib, muhokama qilindi.

"Taqdim etilayotgan axborot-maslahat xizmatlari o‘z vaqtida berilishi, ishonchliligi, tushunarli bo‘lishi, uyg‘unlik, amaliyotda qo‘llash imkoniyati bo‘lishi kabi bir qator xususiyatlarga javob berishi kerak. Bu o‘z navbatida, mazkur me’zonlar orqali taqdim etilayotgan axborot-maslahat xizmatlar sifatini ma’lum darajada baholashga imkon beradi. Shuning uchun ham mijozlarning qoniqish hosil qilishi axborot-maslahat xizmatlarning faoliyati natijalari sifatini baholashda muhim ko‘rsatkich bo‘lib hisoblanadi ", - deydi loyihaning Task menejeri Baxtiyor Toshtemirov.

Shuningdek, seminar davomida ishtirokchilarda telegram-guruhlarda fermerlar o‘rtasida o‘tkazilgan so‘rovnoma natijalari bilan tanishish imkoniyati bo‘ldi. Ushbu so‘rovnoma ham fermerlarning bergan baholari, tavsiyalari va bildirgan istaklarini inobatga olish orqali ko‘rsatilayotgan axborot- maslahat xizmatlarining sifatini oshirish maqsad qilingan.

Seminar yakunida barcha ishtirokchilar berilgan mavzular bo‘yicha muzokaralar olib bordilar va o‘zaro fikr almashib, yaqin kelajakda bajarilishi lozim bo‘lgan vazifalarni belgilab oldilar. Zero, o‘z vaqtida sifatli va to‘g‘ri ma’lumotlarga ega bo‘lish, doimiy ravishda qishloq xo‘jaligi faoliyatlarini olib borish uchun kerakli bilim va ko‘nikmalarini oshirish, ilg‘or agro ishlab chiqaruvchilar va soha mutaxassislari bilan tajriba almashish imkoniyati uchun sharoitlar yaratib berilishi bugungi kunda aksariyat fermer va dehqonlarimiz uchun zaruriy ehtiyoj bo‘lib hisoblanmoqda.