Tashqi reklama faoliyati bilan shug‘ullanayotgan tadbirkorlik sub'ektlarining murojaatlari Savdo-sanoat palatasi tomonidan o‘rganilmoqda

O‘zbekiston Respublkasi Savdo-sanoat palatasiga Reklama industriyasi milliy Assosiasiyasining tadbirkorlik subyektlariga mulk huquqi asosida tegishli bo‘lgan Toshkent shahridagi tashqi reklama obyektlari (konstruksiyalari) noma'lum sabablarga ko‘ra buzib tashlanayotganligi to‘g‘risidagi murojaati joriy yil 19 aprel kuni kelib tushgan.

Palata tomonidan zudlik bilan ushbu masalani tekshirish va tadbirkorlarning hususiy mulkini himoya qilish maqsadida Bosh prokuraturaga xat yuborilgan. Shuningdek, masalaga oydinlik kiritish maqsadida reklama obyektlarini demontaj qilishga asos bo‘lgan huquqiy hujjatni va shunga oid boshqa ma'lumotlarni olish yuzasidan Toshkent shahar hokimligiga so‘rov yuborildi.

Hozirda Palataga a'zo bo‘lgan 2 ta tadbirkorlardan ushbu masala yuzasidan kelib tushgan murojaatlar asosida sudlarga da'vo arizalar kiritish masalasi ko‘rib chiqilmoqda.

Shu bilan birga, yuqorida keltirilgan holatlardan jabr ko‘rgan tadbirkorlik subyektlari o‘z huquq va qonuniy manfaatlarini sud orqali himoya qilish maqsadida da'vo arizalar kiritish yuzasidan Savdo-sanoat palatasiga murojaat qilishlari mumkin.

SSP Axborot-xizmati