Tadbirkorlarga gulchilik va koʼkatchilik sohasini rivojlantirishda imtiyozlar berilmoqda

Oʼzbekiston Respublikasi Prezidentining 2021 yil 4 avgustdagi “Respublika hududlarida gulchilik va koʼchatchilik sohalarini yanada rivojlantirish toʼgʼrisida”gi PQ-5209-sonli Qarori imzolandi.

Mazkur Qarorga koʼra, respublikada gulchilik va koʼchatchilik sohalarini rivojlantirish, soha mutaxassislari malakasini oshirish va tadbirkorlarga har tomonlama koʼmaklashish maqsadida Gul yetishtiruvchilar uyushmasi tashkil etildi.

Аndijon viloyatining Аndijon, Izboskan va Oltinkoʼl tumanlari, Namangan viloyatining Namangan va Davlatobod tumanlarini hamda Jizzax viloyatining Zomin va Gʼallaorol tumanlari gulchilikka ixtisoslashtiriladi. 

Ushbu tumanlarda:

• tajriba tariqasida klasterlari tashkil qilinadi;
• gulchilik bilan shugʼullanayotgan tadbirkorlarga 0,06 gektardan 1 gektargacha yer maydonlari ochiq elektron tanlov orqali 30 yilga dehqon xoʼjaligini yuritish maqsadi uchun yer uchastkalarini ijaraga berish tartibida ajratiladi;
• “Har bir oila-tadbirkor” dasturi doirasida ajratilgan mablagʼlarning kamida 10 foizi gulchilik loyihalarini tashkil qilish uchun ajratiladi;
• “Temir daftar”, “Аyollar daftari” va “Yoshlar daftari”ga kiritilgan fuqarolarga har birining maydoni 2 sotix boʼlgan 25 ta “Gulchilik oʼquv poligon”larini tashkil etish uchun 0,5 gektar yer maydoni elektron onlayn-auktsion yoki ochiq elektron tanlov orqali ijaraga beriladi;
• “Gulchilik oʼquv poligon”larida oʼquv kurslarini muvaffaqiyatli tugatgan va maxsus sertifikat olgan ishsiz, extiyojmand oilalarga gul va koʼchat yetishtirishni rivojlantirish maqsadida 6 sotixdan yer maydoni elektron onlayn-auktsion yoki ochiq elektron tanlov orqali ijaraga beriladi.

2021 yil 1 sentyabrdan boshlab 2021-2024 yillarda yillik eksport tushumida gul eksportidan tushum ulushi kamida 30 foizni va 100 ming АQSh dollardan koʼpini tashkil qiladigan tadbirkorlik subyektlarining xomashyo importi uchun sarflangan transport harajatlarining 50 foizi Eksportni rahbatlantirish agentligi tomonidan qoplanadi.

2023 yil 1 yanvarga qadar tuganaklar, piyozboshlar, tuganaksimon ildizlar, tuganak piyozlar, ildizpoya, jumladan vegetativ tinim holatidagi, vegetatsiya yoki gullash davridagi sertarmoqlari, boshqa tirik oʼsimliklar, qalamchalar va parxishi  importida bojining nol stavkasi qoʼllaniladi.

qishloq yoʼnalishidagi oliy taʼlim muassasalarida Gulchilik magistratura mutaxassisligi boʼyicha kadrlar tayyorlanadi;

Toshkent davlat agrar universitetida Turkiya Respublikasining Isparta amaliy fanlar universitetit bilan hamkorlikda Manzarali bogʼdorchilik va gulchilik sohasida kadrlar tayyorlashni qoʼshma taʼlim dasturlar asosida yoʼlga qoʼyiladi.

Namangan, Samarqand viloyatlari va Toshkent shahrida gul hamda koʼchatlarning yirik ulgurji bozorlari tashkil etiladi.

SSP Matbuot xizmati