Bojxona kodeksini qo‘llash amaliyoti

Poytaxtimizda O‘zbekiston Respublikasining yangi tahrirdagi Bojxona kodeksini amaliyotda qo‘llashning ayrim masalalariga bag‘ishlangan davra suhbati bo‘lib o‘tdi. 

O‘zbekiston Respublikasi Davlat bojxona qo‘mitasining Toshkent shahar bojxona boshqarmasi va “Toshkent-aero” ixtisoslashtirilgan bojxona kompleksi tomonidan O‘zbekiston Respublikasi Oliy Majlisi Qonunchilik palatasi bilan hamkorlikda tashkil etilgan tadbirda prokuratura, adliya, Savdo-sanoat palatasi xodimlari, bojxona brokerlari, tashqi iqtisodiy faoliyat ishtirokchilari qatnashdi. 

Toshkent shahar bojxona boshqarmasi boshlig‘ining birinchi o‘rinbosari T.Rajapov va boshqalar mamlakatimiz iqtisodiy xavfsizligini ta’minlashda sohaga oid qabul qilinayotgan qonunchilik hujjatlari muhim o‘rin tutayotganini ta’kidladi. 

Yangi tahrirdagi Bojxona kodeksi sohaga oid qonunosti hujjatlarining sonini qisqartirish, ushbu yo‘nalishdagi qonunchilik normalari sifatini oshirish, ularni hayotga tatbiq etishning ishonchli mexanizmlarini yaratishda muhim omil bo‘ldi. Kodeks bir-biriga zid bo‘lgan normalarni bartaraf qilish, ularni yanada aniq va tushunarli ifodalashga qaratilgani bilan ahamiyatlidir. 

Kiritilgan o‘zgartishlar tashqi iqtisodiy faoliyat ishtirokchilari uchun eksport-import bilan bog‘liq jarayonlarni yanada osonlashtirdi. Ichki bozorni sifatsiz va kontrabanda mahsulotlardan himoya qilish, xo‘jalik yurituvchi subyektlar, mamlakatimiz ishlab chiqaruvchilari, jumladan, kichik biznes va xususiy tadbirkorlarning jahon bozorlariga chiqishi uchun qo‘shimcha qulay tashkiliy-huquqiy shart-sharoitlar yaratdi. 

Yangi tahrirdagi Bojxona kodeksi qabul qilinishi munosabati bilan bojxona sohasiga oid 1,3 mingdan ortiq normativ-huquqiy hujjat inventarizatsiyadan o‘tkazilib, qayta o‘rganib chiqildi. Natijada yigirmadan ortiq hujjatga tegishli o‘zgartishlar kiritildi, ba’zilari esa o‘z kuchini yo‘qotdi. 

O‘zbekiston Respublikasi Adliya vazirligida davlat ro‘yxatidan o‘tgan, bojxona sohasini tartibga soluvchi 75 idoraviy va idoralararo normativ-huquqiy hujjatga tegishli o‘zgartish va qo‘shimchalar kiritish zarurligi aniqlandi. Shulardan 34 hujjat ustidagi ishlar to‘liq yakuniga yetkazildi. 

Yangi tahrirdagi Bojxona kodeksini keng targ‘ib qilish maqsadida Davlat bojxona qo‘mitasi tomonidan O‘zbekiston Milliy teleradiokompaniyasi va O‘zbekiston Milliy axborot agentligi bilan o‘zaro hamkorlik bo‘yicha qo‘shma dasturlar imzolandi. Ularga muvofiq amalga oshirilgan ishlar natijasida joriy yilning o‘tgan davri mobaynida Toshkent shahar bojxona boshqarmasi tomonidan ommaviy axborot vositalarida muntazam chiqishlar tashkil qilinmoqda. 

Davra suhbatida bojxona organlarida korrupsiyaga qarshi kurashish va uning profilaktikasiga faol ko‘maklashish borasida qilinayotgan ishlar yuzasidan ham fikr-mulohazalar almashildi. 

Manba: uza.uz