O‘zbekistonlik tadbirkorlar Dubayda bo‘lib o‘tayotgan “Gulfood”  ko‘rgazmasida ishtirok etishdi.

Ayni kunlarda O‘zbekiston Savdo-sanoat palatasi tashabbusi bilan mahalliy tadbirkorlar va Dubay ishbilarmon vakillari o‘rtasida o‘zaro hamkorlik aloqalarini yo‘lga qo‘yish maqsadida O‘zbekiston delegasiyasi Dubay shahrida bo‘lib turibdi. Tashrif davomida Savdo-sanoat palatasi raisi o‘rinbosari F.Usmanov Dubay Savdo-sanoat palatasi raisi o‘rinbosari H.Al-Hashemi bilan uchrashdi. Uchrashuv davomida O‘zbekiston va Dubay o‘rtasidagi savdo-iqtisodiy aloqalar, ayni kunlarda Dubay shahrida bo‘lib o‘tayotgan ko‘rgazmalarada o‘zbekistonlik tadbirkorlarning faol ishtirokini ta'minlash hamda tashkil etiladigan uchrashuvlar davomida bir qator kelishuvlarga erishish masalalari muhokama qilindi.

Shuningdek O‘zbekistonlik tadbirkorlar Dubayda bo‘lib o‘tayotgan “Gulfood”  ko‘rgazmasida ishtirok etishdi.

“Gulfood” - bu eng yangi mahsulotlarni topish, bozor o‘zgarishlarini baholash va global yetkazib beruvchilar bilan bog‘lanishni xohlaydigan oziq-ovqat sanoati mutaxassislari uchun maydon hisoblanadi.

2021 yil davomida mazkur ko‘rgazmada 85 dan ortqi mamlakatlardan ishtirokchilar qatnashgan bo‘lib, 156 mamlakatdan xaridorlar va mehmonlar tashrif buyurgan.

2022 yilda esa  198 mamlakatdan 5000 dan ortiq yetkazib beruvchilar bilan to‘g‘ridan-to‘g‘ri aloqa o‘rnatish uchun imkoniyati yaratildi.

“Gulfood”  ko‘rgazmalar zali 8 ta oziq-ovqat va ichimliklar sektoriga bo‘lingan bo‘lib, ichimliklar, sut va sut mahsulotlari, yog‘ va yog‘ mahsulotlari, taniqli brendlar sektorlari shular jumlasidan.

Shuningdek ko‘rgazma davomida F&B (Food&beverage) sohasidagi yetuk mutahassislar tomonidan oziq-ovqat mahsulotlarini ishlab chiqarish va iste'mol qilishning yangi va barqaror shakllari to‘g‘risidagi muhokamalar ham o‘tkazildi.

Shu bilan birga O‘zbekiston delegasiyasining “Expo Dubai 2020” ko‘rgazmasiga tashrifi hamda Dubaylik tadbirkorlar bilan B2B uchrashuvlar o‘tkazishi rejalashtirilgan.

SSP Matbuot xizmati