O‘zbekiston Savdo-sanoat palatasining navbatdagi videokonferensiya yig‘ilishi

Joriy yilning 2 aprel' kuni O‘zbekiston Savdo-sanoat palatasi raisi D.Vahobov boshchiligida Palata ijroiya qo‘mitasi hamda hududiy boshqarmalar boshliqlari ishtirokida videokonferensiya shaklidagi yig‘ilish bo‘lib o‘tgandi.

O‘zbekiston Respublikasi Prezidenti rahbarligida 2022 yilning 31 mart kuni “Makroiqtisodiy barqarorlikni ta'minlash, jahon iqtisodiyotidagi murakkab vaziyatdan kelib chiqib, hudud va tarmoqlarni rivojlantirish, aholi farovonligini oshirish masalalari”ga bag‘ishlangan yig‘ilish doirasida tadbirkorlik sub'ektlarini qo‘llab-quvvatlash va ularga qo‘shimcha imkoniyatlar yaratish bo‘yicha bir nechta yo‘nalishda aniq vazifalar belgilab berildi.

Palata raisi D.Vaxabov ushbu vazifalarni amalga oshirish maqsadida Palata Ijroiya qo‘mitasi hamda hududiy boshqarma boshliqlariga bir qator ko‘rsatma va topshiriqlar berib o‘tdi.

Jumladan, tadbirkorlik sub'ektlarining muammolarini tarmoqlar kesimida o‘rganish, birja savdolarida mahalliy tadbirkorlik sub'ektlarining ishtirokini ta'minlashga ko‘maklashish hamda oziq-ovqat mahsulotlari ishlab chiqaruvchi tadbirkorlar bilan uchrashib, ularning yuzaga kelgan muammolarini o‘rganib, bartaraf etish vazifalari yuklatildi.

Yig‘ilish davomida Palata raisi tomonidan tadbirkorlikni rivojlantirish orqali bo‘sh ish o‘rinlari yaratish, xorijiy tadbirkorlarning O‘zbekistonda o‘z biznesini boshlash yoki rivojlantirishlari bo‘yicha qo‘shimcha tashabbuslar va loyihalar bilan chiqish zarurligi ta'kidlandi.