Oʼzbekiston-Italiya munosabatlari mustahkamlanmoqda

Joriy yil 6 sentyabr kuni Oʼzbekiston Savdo-sanoat palatasida Italiyaning tijorat sohasida faoliyat koʼrsatuvchi konsalting kompaniyalari vakillari bilan uchrashuv boʼlib oʼtdi.

Uchrashuvda Oʼzbekiston va Italiya ishbilarmon doiralari oʼrtasida tekstilь, oziq-ovqat sanoati, qishloq xoʼjaligi sohasida hamkorlik qilish hamda zamonaviy texnologiyalarni Oʼzekistonga jalb etish masalalari muhokama etildi.

Italiya tomoniga Oʼzbekiston bilan hamkorlik qilishning istiqbolli yoʼnalishlari borasida takliflar bildirilib, jumladan, Oʼzbekiston mahsulotlarini Italiyaga eksport qilishda mahalliy eksporterlarga Yevropa Ittifoqidagi bozor talablari, mahsulotga qoʼyiladigan xalqaro sertifikatsiya va standartlarga oid talablarni yetkazishda aloqalarni kengaytirish masalalari koʼrib chiqildi.

Uchrashuvda Oʼzbekiston mahsulotlari uchun Yevropa Ittifoqining Preferentsiyalar bosh tizimi doirasida pasaytirilgan va foizsiz boj stavkalarini qoʼllagan holda eksport qilish imkoniyatlari boʼyicha hamkorlik aloqalarini yanada kengaytirish maqsadga muvofiqligi taʼkidlab oʼtildi.

Tadbir yakuni boʼyicha Oʼzbekiston ishbilarmon doiralari uchun joriy yil oktyabrь oyida tashqi savdo operatsiyalarini amalga oshirish borasida Italiyada biznes yuritish shartlari, italiyalik hamkorlar topish hamda eksport shartnomalari tuzishga oid talablar toʼgʼrisida taqdimotlar oʼtkazishga kelishib olindi.