O‘zbekistonda Birinchi Xalqaro franchayzing ko‘rgazmasi bo‘lib o‘tdi

Joriy yilning 4 oktabr kuni Hilton Tashkent City mehmonxonasida O‘zbekistonda Birinchi Xalqaro franchayzing ko‘rgazmasi bo‘lib o‘tdi. Tadbir Franchayzing uyushmasi va O‘zbekiston Savdo-sanoat palatasi tomonidan tashkil etilgan.

Franchising Expo Uzbekistan ko‘rgazmasi – franchayzerlar va potensial franchayzerlar uchun muhim voqealardan biridir. Tashkilotchilarning asosiy maqsadi – O‘zbekistonda franchayzing tarmoqlarini rivojlantirish va o‘zbek brendlarini xalqaro miqyosga olib chiqib, jahon miqyosda keng tanitish imkoniyatlarini yaratishdir.

Ko‘rgazmaning rasmiy ochilishi O‘zbekiston Savdo-sanoat palatasi rais o’rinbosari Jahongir Mamajanov va O‘zbekiston Franchayzing assotsiatsiyasi prezidenti Murat A’zamov ishtirokida bo‘lib o‘tdi.

Qolaversa, ko‘rgazma doirasida, xalqaro miqyosdagi yetakchi ma’ruzachilar, franchayzing orqali allaqachon katta daromadga erishgan muvaffaqiyatli tadbirkorlar, shuningdek, davlat idoralari, yirik franchayzing tarmoqlari va qo‘llab-quvvatlash institutlari vakillari ham ishtirok etishdi.

Tashrif buyuruvchilar birinchi qo‘l biznesining ishonchli va manfaatli franshizalari haqida ma’lumotga ega bo‘lishdi, franshizalar bozorining so‘nggi yangiliklari bilan tanishishdi.

Tadbirda O‘zbekistondagi franchayzing bozorining istiqbollari, Yevropa hududidagi hozirgi savdo tendensiyalari, franchayzing bozoriga kirishdagi huquqiy risklar, logistika xizmatlari franshizasi, franchayzingning afzalliklari va o‘zbek brendlarini jahon darajasiga olib chiqish imkoniyatlari muhokama qilindi.

Shuningdek, ushbu ko‘rgazma franchayzerlar va franshiza xarid qiluvchilar uchun manfaatli biznes hamkorlik o‘rnatish, bank, yuridik kompaniya, marketing agentliklari uchun muvaffaqiyatli, barqaror o‘sayotgan mijozlarni topish uchun ham katta imkoniyat bo’ldi. Servis kompaniyalar esa o‘z xizmatlari, tadbirkorlar uchun mavjud sharoitlar haqida so‘zlab berishdi.

SSP matbuot xizmati