Ozarbayjon MUSIAD vakillari bilan uchrashuv bo‘lib o‘tdi

Joriy yilning 12 oktabr kuni Ozarbayjon MUSIAD Mustaqil sanoatchilar va tadbirkorlar uyushmasi vakillari O‘zbekiston Savdo-sanoat palatasiga tashrif buyurdi.

Uchrashuvda O‘zbekiston Savdo-sanoat palatasi raisining o‘rinbosari F.Toshpo‘latov va ikki davlat yirik biznes jamiyatlar vakillari ishtirok etdi.

So‘nggi yillarda O‘zbekiston bilan Ozarbayjon o‘rtasidagi munosabatlar sezilarli rivojlanish impulsiga ega bo‘lib, mamlakatlar o‘rtasidagi o‘zaro hamkorlik strategik sheriklik darajasigacha ko‘tarildi. Mamlakatlarimiz sherikligi eʼtiboridan chetda qoladigan biron bir soha yo‘q.

Aytib o‘tish joizki, mamlakatlarimiz o‘rtasidagi tovar ayirboshlash 2021-yilda 118,7 mln dollarni (2020 yilga nisbatan +41,8% ga o‘sgan), shu jumladan eksport 75,8 mln dollarni (+39,9%), import 42,9 mln dollarni (+45,3%) tashkil etdi.

Ikki tashkilot o‘rtasidagi uchrashuvda mavjud hamkorlikni rivojlantirish, aloqalarni kengaytirish va qo‘shma loyihalarni amalga oshirish yuzasidan fikr almashildi.

Uchrashuv yakunida tomonlar tashkilotlarimiz o‘rtasidagi sheriklik munosabatlarini rivojlantirishda faol ishtirok etish, shuningdek, mamlakatlarimiz ishbilarmon doiralariga, o‘zaro manfaatli hamkorlikni yo‘lga qo‘yishda ko‘maklashishga tayyor ekanliklarini bildirdilar.

SSP matbuot xizmati