Kanada-Yevrosiyo Savdo palatasining Toshkentdagi yig‘ilishi

Joriy yilning 7-noyabr kuni Kanadaning O‘zbekiston Respublikasidagi Favqulodda va Muxtor Elchisi Elison Leklerkning tashrifi doirasida «Hyatt Regency Tashkent» mehmonxonasida Kanada-Yevrosiyo Savdo palatasi (CECC) bilan yetakchi kompaniya, tashkilot va idora vakillari ishtirokida yig‘ilish bo‘lib o‘tdi.

Shuningdek, tadbir Kanada va boshqa mamlakatlardagi CECC Direktorlar Kengashi aʼzolari uchun onlayn formatida o‘tkazildi.

O‘zbekiston Savdo-sanoat palatasi boshqarma boshlig‘i Oleg Rijichenko o‘z chiqishida mehmonlarni Palata faoliyati bilan tanishtirdi, shuningdek, O‘zbekiston hududida iqtisodiy va boshqa faoliyatni amalga oshirishda Kanada doiralari vakillariga ko‘rsatilayotgan ko‘mak to‘g‘risida so‘zlab berdi.

Aytib o‘tish joizki, 2022-yil aprel oyidan boshlab Milliy Kengash Direktorlari va aʼzo tashkilotlar Bayonnomasi asosida CERBA (Kanadaning Rossiya va Yevrosiyodagi Ishbilarmonlik assotsiatsiyasi), Kanada-Yevrosiyo Savdo palatasi CECC deb qayta nomlandi, shuningdek, O‘zbekiston Respublikasidagi CERBA vakolatxonasi Adliya vazirligida CECCning O‘zbekistondagi filiali deb qayta ro‘yxatdan o‘tkazildi. CECC CERBAning huquqiy vorisi hisoblanadi.

SSP matbuot xizmati