Samarqand shahrida O‘zbekiston-Vengriya biznes-forumi bo‘lib o‘tdi

2022 yil 10-11 noyabr kunlari Samarqand shahrida Turkiy davlatlar tashkilotining birinchi sammiti o‘tkazilishi munosabati bilan unda ishtirok etish uchun Vengriya Bosh vaziri Viktor Orbanning tashrifi davomida 10 noyabr kuni Samarqand shahrining “Silk Road by Minyoun” mehmonxonasida O‘zbekiston-Vengriya qo‘shma biznes-forumi bo‘lib o‘tdi.

Mazkur tadbir O‘zbekiston Respublikasi Qishloq xo‘jaligi vazirligi, O‘zbekiston Savdo-sanoat palatasi hamda O‘zbekiston Respublikasi Investitsiyalar va tashqi savdo vazirligi huzuridagi Xorijiy investitsiyalarni jalb etish agentligi bilan hamkorlikda tashkil etildi.

Biznes-forumda Vengriya tomonidan tashrif buyurgan 60 nafarga yaqin yirik va nufuzli kompaniyalar vakillari bilan respublikamiz iqtisodiyotining turli sohalaridan taklif etilgan 100 nafardan ortiq tadbirkorlik subʼektlari qatnashdilar.

Tadbirni O‘zbekiston Respublikasi Bosh vazirining o‘rinbosari - investitsiyalar va tashqi savdo vaziri Jamshid Xodjayev hamda Vengriya Tashqi ishlar va savdo vaziri Peter Siyyarto kirish so‘zi bilan ochib berib, unda ikki tomonlama munosabatlarning yuqori darajasi va mamlakatimiz o‘rtasidagi iqtisodiy hamkorlik aloqalari tobora rivojlanib borayotganligi alohida qayd etib o‘tildi. Shuningdek, mazkur Forum ikki tomonlama savdo-iqtisodiy va investitsiyaviy hamkorlik aloqalarini yanada rivojlantirishga qo‘shimcha turtki berishiga ishonch bildirildi.

Tadbir davomida O‘zbekiston Respublikasi Qishloq xo‘jaligi vaziri A.Voitov, Vengriya  Tashqi ishlar va tashqi iqtisodiy aloqalar vazirligi davlat kotibining o‘rinbosari K.Bixari, O‘zbekiston Savdo-sanoat palatasi raisi D.Vaxabov, Vengriya Savdo-sanoat palatasi raisi L.Parrag hamda To‘g‘ridan-to‘g‘ri investitsiya fondi bosh direktori A.Nazirov tomonidan ikki tomonlama aloqalarni rivojlantirishga qaratilgan istiqbolli yo‘nalishlar bo‘yicha maʼruza va taqdimotlar o‘tkazildi.

Forum doirasida tashkil etilgan B2B va B2G formatidagi uchrashuvlarda ikki mamlakat ishbilarmon doira vakillari o‘rtasida savdo-iqtisodiy va investitsiyaviy loyihalarni amalga oshirish masalalari muhokama etildi.

O‘zbekiston-Vengriya Biznes-forumi yakuni bo‘yicha ishbilarmon doiralari o‘rtasida bir qator hamkorlik bitim va kelishuvlari imzolandi. Jumladan, G‘oz pashtetini ishlab chiqarish va g‘ozlarni yetishtirish bo‘yicha qo‘shma korxona tashkil etish to‘g‘risida "Vostok Invest" MCHJ hamda "Royalpate" Kft o‘rtasidagi bitim,  Markaziy bank hamda "Pénzjegynyomda" Zrt. o‘rtasidagi shartnoma va Samarqand Davlat universiteti hamda "MATE" o‘rtasidagi memorandum tuzildi.

SSP matbuot xizmati